الماتى وبلىسىنىڭ اكىمى مارات سۇلتانعازيەۆ ورتالىق كوممۋنيكاتسيالار قىزمەتىندەگى بريفينگتە ءوڭىردىڭ اۋىل شارۋاشىلىعىن دامىتۋ باعىتىنداعى ناتيجەلەرى مەن جوسپارلارىن جاريالادى. اكىمنىڭ ايتۋىنشا، اگروسەكتور وبلىس ەكونوميكاسىنىڭ باسىم باعىتتارىنىڭ ءبىرى بولىپ قالا بەرەدى.
2024 جىلدىڭ قورىتىندىسى بويىنشا اۋىل شارۋاشىلىعىنىڭ جالپى ءونىم كولەمى 682,3 ملرد تەڭگە بولىپ، وڭىرلىك ءونىمنىڭ 7%-ىن بەرگەن. بيىل بۇل كورسەتكىش 3,3% وسىممەن 751 ملرد تەڭگە دەڭگەيىندە جوسپارلانعان. ال 2025 جىلدىڭ 10 ايىندا جالپى كولەم 649,1 ملرد تەڭگەگە جەتىپ، نقي 101,1% بولدى.
مارات سۇلتانعازيەۆتىڭ ايتۋىنشا، اۋىل شارۋاشىلىعى ونىمدەرىنىڭ ەكسپورتى دا ارتىپ وتىر، بۇل كورسەتكىش 345,2 ملن اقش دوللارىنا جەتىپ، بىلتىرعى كەزەڭمەن سالىستىرعاندا 15% كوبەيدى (2024 جىلى – 299 ملن دوللار).
اكىم ءسۇت-تاۋار فەرمالارىنىڭ جەلىسى مەملەكەتتىك قولداۋ ارقىلى قارقىندى دامىپ جاتقانىن ەرەكشە اتاپ ءوتتى. قازىر ءوندىرىستى جانە ءسۇتتى قايتا وڭدەۋدى ارتتىرۋعا باعىتتالعان 13 جوبا جۇزەگە اسىرىلىپ جاتىر، وعان رەسپۋبليكالىق بيۋدجەتتەن 15 ملرد تەڭگە بولىنگەن. 2024 جىلى 1,3 ملرد تەڭگەگە ەكى جوبا ىسكە استى، ال بيىل 7 100 باس ءىرى قاراعا ارنالعان 11 جاڭا ءسۇت فەرماسىنىڭ قۇرىلىسى اياقتالماق.
بۇگىندە وبلىس اۋىل شارۋاشىلىعىنا بولىنەتىن سۋبسيديا كولەمى بويىنشا رەسپۋبليكادا 8-ورىندا (38,2 ملرد تەڭگە). سوعان قاراماستان، جالپى ءونىم كولەمى بويىنشا ءوڭىر تۇراقتى تۇردە العاشقى بەستىكتە.
