ءماجىلىس دەپۋتاتى، الەۋمەتتىك-مادەني دامۋ كوميتەتىنىڭ توراعاسى اسحات ايماعامبەتوۆ ۇستازدار مەرەكەسى قارساڭىندا، قۋانىشتى جاڭالىعىمەن ءبولىستى، دەپ حابارلايدى “ادىرنا”.
بۇل تۋرالى ول Instagram پاراقشاسىندا جاريا ەتتى.
“بۇل مەرەكەدە جىلى لەبىز عانا ەمەس، ۇستازداردى قورعايتىن جاڭا زاڭدى دا دايىنداپ قويدىق.
مۇعالىم موبيلوگراف، بلوگەر، كۇزەتشى نەمەسە چات مودەراتورى بولماۋى كەرەك. ونىڭ باستى جۇمىسى – بالانى وقىتۋ. بۇل تۋرالى مەملەكەت باسشىسى تاعى دا باسا ايتتى.
ءبىز، دەپۋتاتتار، «پەداگوگ مارتەبەسى تۋرالى» زاڭعا تۇزەتۋلەر ازىرلەپ، ۇكىمەتكە جولدادىق”، - دەدى دەپۋتات.
مۇعالىمدەر ءۇشىن قانداي وزگەرىستەر بار؟
“قايتالاناتىن ەسەپكە توقتاۋ قويىلادى. قاعاز با، تسيفر ما – بىرەۋىن عانا تولتىرۋ قاجەت. سونىمەن قاتار ء“بىر رەت ءبىر جۇيەگە ەنگىزدىڭ بە – جەتەدى” قاعيداسى ەنگىزىلەدى. ياعني كۇندەلىك نەمەسە نوبد نەمەسە Bilimland جۇيەلەرىنىڭ بىرەۋىنە ەنگىزىلگەن دەرەك باسقا پلاتفورمالاردا قايتالانباۋى ءتيىس.
Instagram / Facebook – تەك قالاۋىمەن
مۇعالىمدى پوست جازۋعا نەمەسە بلوگ جۇرگىزۋگە ماجبۇرلەۋگە بولمايدى. بۇل – ەرىككە بايلانىستى دۇنيە. چاتتار مەن حابارلامالار تەك رەسمي LMS جۇيەلەرى مەن ەلەكتروندى پوشتادا بولۋى كەرەك. مۇعالىم تاۋلىك بويى چاتتا وتىراتىن مودەراتور ەمەس.
جاۋاپكەرشىلىكتىڭ ايقىن شەگى
مەكتەپتەن تىس جاعدايعا مۇعالىم جاۋاپ بەرمەيدى. ول كۇزەتشى دە، دەتەكتيۆ تە ەمەس. بۇعان قوسا، “مۇعالىمگە ءتان ەمەس فۋنكتسيالار” دەگەن ۇعىم زاڭدا العاش رەت ايقىن جازىلدى. ەندى پەداگوگ زاڭمەن جانە ەڭبەك كەلىسىمشارتىندا كورسەتىلمەگەن جۇمىسقا تارتىلمايدى.
مەكتەپ – اتا-انا كەلىسىمى
مەكتەپ پەن اتا-انا اراسىنداعى كەلىسىمنىڭ مارتەبەسى كۇشەيەدى. تاربيە – ورتاق ءىس. بار جاۋاپكەرشىلىك مۇعالىمگە عانا ارتىلماۋى ءتيىس. ەندى اتا-انالار مەن مەكتەپ وسى كەلىسىمدى قاتاڭ ۇستانۋعا مىندەتتى بولادى.
شىنايى قورعانىس
پەداگوگ مارتەبەسىن بۇزعانى ءۇشىن ايىپپۇلدار ايتارلىقتاي وسەدى. سونىمەن قاتار زاڭعا مۇعالىمگە پسيحولوگيالىق جانە فيزيكالىق زورلىق-زومبىلىق جاساۋعا جول بەرىلمەيتىنى تۋرالى نورما ەنگىزىلدى.
ءبىز، دەپۋتاتتار، ءوز قادامىمىزدى جاسادىق. مەملەكەت باسشىسىنىڭ تاپسىرمالارى مەن پەداگوگتەردىڭ ۇسىنىستارى نەگىزىندە ارنايى تۇزەتۋلەر ازىرلەپ، ۇكىمەتكە جىبەردىك. ەندى رەسمي قورىتىندىسىن كۇتەمىز.
بۇل باستامانى قولداساڭىزدار – بولىسىڭىزدەر.
كاسىبي مەرەكەلەرىڭىزبەن، قۇرمەتتى ارىپتەستەر!
سىزدەرگە زور دەنساۋلىق، بەيبىت اسپان، كاسىبي تابىس جانە شاكىرتتەردىڭ العىسىن تىلەيمىن.
قۇتتىقتايمىز. قورعايمىز. زاڭمەن بەكىتەمىز”، دەدى ايماعامبەتوۆ.
