ماجىلىسمەن قازا تاپقان شەرزات بولاتتىڭ ءۇيىنىڭ ورتەنۋىنە قاتىستى پىكىر ءبىلدىردى، دەپ حابارلايدى "ادىرنا" ۇلتتىق پورتالى.
ءماجىلىس دەپۋتاتى اسحات ايماعامبەتوۆ Telegram-ارناسىندا قايعىلى وقيعاعا قاتىستى پىكىر ءبىلدىردى.
"تالعاردا بولعان قايعىلى وقيعا جاعا ۇستاتتى. جاس جىگىتتى ءولتىرىپ، وتباسىنىڭ ءۇيىن ورتەپ جىبەرگەن جاۋىزدىق، حايۋاندىق جانە ادىلەتسىز قىلمىس ءبارىمىزدىڭ قابىرعامىزدى قايىستىردى. بۇل وقيعا تەك قۇقىق قورعاۋ ورگاندارىنا عانا ەمەس، بۇكىل قوعامعا سىن. شەرزات بولاتتىڭ وتباسىنا قايعىرىپ كوڭىل ايتامىن. بۇل ءىستى تەرگەۋدە بارىنشا اشىقتىق پەن ادىلدىك قاجەت. كىنالىلەردىڭ بارلىعى زاڭ الدىندا جاۋاپقا تارتىلىپ، ءوز جازاسىن الۋى ءتيىس. پوليتسيا مەن پروكۋراتۋرا ەشكىمنىڭ جازادان قۇتىلىپ كەتپەۋىن قامتاماسىز ەتۋى كەرەك. بۇل قىلمىس قۇقىق قورعاۋ ورگاندارىندا جۇيەلى رەفورمالاردى ىسكە اسىرۋعا سەبەپ بولۋى قاجەت.
بۇل زاڭنىڭ تالابى عانا ەمەس، قوعام الدىنداعى پارىزىمىز", - دەدى ول.
ودان بولەك، ماجىلىسمەن ءبارى زاڭ اياسىندا بولۋى كەرەكتىگىن ايتتى.
"كىنالىلەرگە قارسى زورلىق-زومبىلىق تانىتۋ ماسەلەنى شەشپەيدى. قاقتىعىستى ۋشىقتىرماي، ءوز نارازىلىعىمىز بەن پوزيتسيامىزدى ءبىلدىرۋ كەزىندە زاڭدى بۇزباي، وڭتايلى جولدى قولدانعان ءجون. بارلىق ماسەلەنى زاڭ اياسىندا شەشۋگە بولادى جانە ءبىزدىڭ قوعامدا كەز كەلگەن ماسەلە سولاي شەشىلۋى قاجەت. بۇل قايعىلى وقيعانى قاساقانا تۇردە جاعدايدى تۇراقسىزداندىرۋ ءۇشىن پايدالانۋى مۇمكىن ەكەنىن جوققا شىعارمايمىن. سوندىقتان قازىر ارانداتۋعا بوي الدىرماۋ، ءادىل جازانى قامتاماسىز ەتۋ جانە قۇقىق قورعاۋ جۇيەسىندە تەرەڭ، جۇيەلى رەفورمالار جاساۋ ءۇشىن كۇش-جىگەرىمىزدى بىرىكتىرۋ اسا ماڭىزدى", - دەپ جازدى ايماعامبەتوۆ.
ماجىلىسمەن تەكسەرىلمەگەن اقپاراتقا سەنبەۋگە شاقىردى.
"تەكسەرىلمەگەن اقپاراتتاردى تاراتىپ، ەلدى دۇرلىكتىرمەيىك. بارلىق شەشىمدەر تەك زاڭ شەڭبەرىندە قابىلدانۋى ءتيىس. قۇقىق قورعاۋ ورگاندارىنىڭ قاجەتتى كۇشتەرى تولىق جۇمىلدىرىلدى. بۇل ءىس باس پروكۋروردىڭ باقىلاۋىنا الىنعان، ال وتباسى پوليتسيا قورعاۋىندا. قازىرگى ۋاقىتتا قىلمىسكەرلەردى جازالاپ، قۇقىقتىق جۇيەنىڭ بارلىق قاحارلى كۇشىن كورسەتۋ ماڭىزدى", - دەدى ول.
ايتا كەتەيىك، 12 قازان كۇنى تالعاردا مارقۇم شەرزات بولاتتىڭ تۇرعان ءۇيى ورتەنىپ كەتتى.
