پاۆلودار وبلىسىندا 5 مىڭ توننادان استام استىق ءشىرىپ كەتۋى مۇمكىن، دەپ حابارلادى استانا ارناسى.
ويتكەنى وڭىردە بيداي كەپتىرەتىن قوندىرعىلارعا قۇياتىن گاز تاپشى. سونىڭ سالدارىنان ديقاندار جاز بويى باپتاعان ءونىمىن قامباعا قۇيا الماي وتىر.
"قامبادا 5 مىڭ توننادان استام استىق جاتىر. ەگەر ءبىر اپتانىڭ ىشىندە بۇل ماسەلە شەشىلمەسە، قانشاما بيدايىمىز ءشىرىپ كەتەيىن دەپ تۇر. سوندىقتان قۇزىرلى ورگانداردان كومەك سۇرايمىن. بيدايدى جوعالتساق نانسىز قالۋىمىز مۇمكىن. ال ءشىرىپ كەتكەن استىقتى مالدىڭ ءوزى جەمەيدى", - دەيدى ديقانشى نيكولاي ميللەر.
قازان ايىندا پاۆلودار مۇناي زاۋىتى جوسپارلى جوندەۋدەن وتەدى. سوندىقتان بۇل ماسەلەنىڭ جاقىن كۇندەرى شەشىلە قويۋى ەكى تالاي. ال شىرىگەن بيدايدى ديقاندار قوقىس الاڭىنا جىبەرگەننەن باسقا امال جوق دەپ وتىر.
سولتۇستىك قازاقستاندا دا تۋرا وسىنداي جاعداي ورىن العان. وڭىردەگى ءىرى ديىرمەندەر وسىمەن ەكى اپتادان بەرى اۋلادا جاتقان دىمقىل بيدايدى كەپتىرە الماي اۋرە. ديزەلدىك وتىن جەتىسپەگەن سوڭ ۇن فابريكالارى گازعا كوشكەن ەدى. ەندى سۇيىق وتىننىڭ بۇل ءتۇرى دە تاپشى بولىپ تۇر.
ديىرمەننىڭ كوممەرتسيالىق ديرەكتورى تايسيا كولەگوۆانىڭ ايتۋىنشا، بيداي قىرمان باسىنان دىمقىل قالپىندا كەلەدى. ونى تەز ارادا كەپتىرىپ، وڭدەۋ كەرەك. جاڭبىر جاۋسا جاعداي ودان بەتەر ۋشىعايىن دەپ تۇر.
جەرگىلىكتى بيلىك وكىلدەرى تاپشىلىق قۇزىرلى مينيسترلىك ەنگىزگەن جاڭا جۇيەمەن بايلانىستى دەپ وتىر. ەنەرگەتيكا مينيسترلىگى كۇنى بۇگىنگە دەيىن ايماقتارعا كوگىلدىر وتىندى تاپسىرىسقا سايكەس ۇلەستىرىپ كەلگەن. ەندى جاڭادان ەنگىزىلگەن جۇيە بويىنشا ولار ەلدەگى سۇيىتىلعان گازدىڭ 40 پايىزىن كۆوتامەن بەرىپ، قالعانىن ەلەكتروندى بيرجاعا شىعارعان.
سولتۇستىك قازاقستان وبلىسى تۇرعىن ءۇي كوممۋنالدىق شارۋاشىلىعى جانە ەنەرگەتيكا باسقارماسىنىڭ ءبولىم باسشىسى ەرلان قايىربەكوۆتىڭ ايتۋىنشا، گازبەن قامتۋ كومپانيالارى ەلەكتروندى ساۋدا-ساتتىق كەزىندە ءونىمدى ساتىپ الۋعا ۇلگەرمەي قالدى.
"سوندىقتان ولاردا گاز تاپشىلىعى پايدا بولدى. ءبىزدىڭ ايماق اي سايىن گازدىڭ 5800 تونناسىن تۇتىنادى. قازىر ءونىم تاۋسىلىپ بارا جاتقاندىقتان، ءبىز ەنەرگەتيكا مينيسترلىگىنەن قوسىمشا 1,5 مىڭ توننا سۇرادىق. قۇزىرلى ورگان بىزگە بۇل كولەمدى بىردەن ءبولدى", - دەيدى ول.
شەنەۋنىكتەردىڭ ايتۋىنشا، ايماقتىق گاز وپەراتورلارى سالعىرتتىق تانىتپاي ەلەكتروندى الاڭدا ونىمگە بىردەن تاپسىرىس بەرسە گاز تاپشىلىعى بولمايدى.
الايدا تسيفرلىق فورماتتىڭ كەمشىلىكتەرى جايىندا ەشكىم ويلاماسا كەرەك. وسى قاربالاس كەزەڭدە سۇيىتىلعان گازدىڭ باعاسى تاعى شارىقتاپ، 93 تەڭگەگە جەتكەن.
