شىمكەنتتە وقۋ-جاتتىعۋ كەزىندە گراناتا جارىلىپ، بىرنەشە كۋرسانت جاراقات الدى. بۇل اقپاراتتى قالالىق پوليتسيا دەپارتامەنتىنىڭ ءباسپاسوز قىزمەتى راستادى، دەپ حابارلايدى “ادىرنا” ۇلتتىق پورتالى.
بۇعان دەيىن الەۋمەتتىك جەلىلەردە شىمكەنتتەگى باۋىرجان مومىشۇلى اتىنداعى وقۋ ورتالىعىندا پوليتسەيلەر وقۋ-جاتتىعۋ وتكىزىپ جاتقانى، ونىڭ بارىسىندا "كۇتپەگەن جەردەن شۋلى گراناتا لاقتىرعانى" تۋرالى اقپارات پايدا بولعان. بەس ادامنىڭ جارالانعانى حابارلانعان ەدى.
"بۇل فاكتى جوسپارلى وقۋ-جاتتىعۋ شارالارى كەزىندە ورىن العان. وقيعانىڭ بارلىق ءمان-جايىن انىقتاۋ ماقساتىندا تەرگەۋ امالدارى جۇرگىزىلۋدە", – دەپ حابارلادى شىمكەنت قالالىق ىشكى ىستەر دەپارتامەنتىنىڭ باسپاسوز قىزمەتى.
سونىمەن قاتار ەكى كۋرسانتتىڭ ءالى اۋرۋحانادا جاتقانى بەلگىلى بولدى.
"قازىرگى ۋاقىتتا ەكى كۋرسانت مەديتسينالىق مەكەمەدە ەمدەلىپ جاتىر، ولاردىڭ جاعدايى تۇراقتى", – دەلىنگەن حابارلامادا.
