قالادا يندۋستريالىق ينفراقۇرىلىم دامىپ، وتاندىق ءونىم وندىرۋشىلەردىڭ ۇلەسى ارتۋدا. وسىعان وراي، شاھاردا جۇمىس ىستەپ تۇرعان كاسىپورىنداردىڭ جۇمىسىن جانداندىرۋ، وندىرىستىك الەۋەتىن ارتتىرۋ جانە جاڭا جۇمىس ورىندارىن اشۋ - باستى باسىمدىقتاردىڭ ءبىرى بولىپ تابىلادى.
وسى باعىتتا تۇركىستان قالاسىنىڭ اكىمى ازىمبەك پازىلبەكۇلى وندىرىستىك نىسانداردى ارالاۋ بارىسىندا «نۇر ستروي لتد» جاۋاپكەرشىلىگى شەكتەۋلى سەرىكتەستىگىنىڭ وندىرىستىك قۋاتىمەن تانىستى.
2005 جىلدان بەرى جۇمىس ىستەپ كەلە جاتقان كاسىپورىن تەمىر-بەتون بۇيىمدارىن شىعارۋمەن اينالىسادى. بۇگىندە ءوندىرىس ورنىندا جىلىنا 10 000 دانا جابىن پليتاسىن،30 000 دانا تەمىر-بەتون تىرەگىن جانە 50 000 توننا اسفالتتى سىندى ساپالى ءونىم شىعارىلادى. ءوندىرىس ورنى قالاداعى جول-قۇرىلىس سالاسىنا قاجەتتى ماتەريالدارمەن تۇراقتى تۇردە قامتاماسىز ەتىپ وتىر. 2023 جىلدىڭ قورىتىندىسى بويىنشا كاسىپورىن 72 مىڭ دانا ءونىم وندىرگەن.
قازىرگى تاڭدا كاسىپورىندا 164 ادام تۇراقتى جۇمىسپەن قامتىلعان. «نۇر ستروي لتد» جشس شىعارعان ونىمدەردىڭ ساپاسى ست-KZ ۇلتتىق سەرتيفيكاتىمەن دالەلدەنگەن، بۇل – وندىرىلەتىن ماتەريالداردىڭ 100% وتاندىق ەكەنىن جانە حالىقارالىق ستاندارتتارعا ساي كەلەتىنىن ايعاقتايدى.
قالا اكىمدىگى وڭىردە يندۋستريالىق الەۋەتتى دامىتۋ، قۇرىلىس سالاسىن قولداۋ جانە ءوندىرىس وشاقتارىن ينفراقۇرىلىممەن قامتاماسىز ەتۋ باعىتىندا جۇيەلى جۇمىستار جۇرگىزىپ كەلەدى. وندىرىستىك مەكەمە وكىلدەرىمەن جۇزدەسۋ بارىسىندا ازىمبەك پازىلبەكۇلى كاسىپورىننىڭ قىزمەتىن جوعارى باعالاپ، وتاندىق ءونىم ۇلەسىن ارتتىرۋ، جۇمىس ورىندارىن كوبەيتۋ جانە قالا ەكونوميكاسىنا قوسار ۇلەسىن ەسەلەۋ ماسەلەلەرى الداعى ۋاقىتتا دا باستى نازاردا بولاتىنىن اتاپ ءوتتى.
ۇقساس جاڭالىقتار
