29 قىركۇيەك كۇنى قازاقستان پرەزيدەنتى قاسىم-جومارت توقاەۆ يتاليا پرەزيدەنتى سەردجو ماتتارەللانى دوستىق پەن ىنتىماقتاستىقتى نىعايتۋداعى ەڭبەگى ءۇشىن ءى دارەجەلى «دوستىق» وردەنىمەن ماراپاتتادى، دەپ حابارلايدى "ادىرنا" ۇلتتىق پورتالى.
ماراپاتتاۋ راسىمىندە مەملەكەت باسشىسى يتاليالىق ارىپتەسىنىڭ ەلىندە جانە حالىقارالىق دەڭگەيدە زور بەدەلگە يە ساياسي قايراتكەر ەكەنىن اتاپ ءوتتى.
سونداي-اق يتاليانىڭ ەكونوميكا، يننوۆاتسيالىق تەحنولوگيالار، ەكولوگيا جانە «جاسىل» ەنەرگەتيكا سالاسىنداعى جەتىستىكتەرىن جوعارى باعالاپ، سەردجو ماتتارەللانىڭ قازاق-يتاليا بايلانىستارىن تەرەڭدەتۋگە قوسقان ۇلەسىنە ەرەكشە توقتالدى.
ءوز كەزەگىندە سەردجو ماتتارەللا قاسىم-جومارت توقاەۆقا يتاليانىڭ ەڭ جوعارى مەملەكەتتىك ناگراداسى – «يتاليا رەسپۋبليكاسىنا سىڭىرگەن ەڭبەگى ءۇشىن» وردەنىن تابىس ەتتى.
– ەلىمىزدىڭ بۇل جوعارى ناگراداسى يتاليامەن دوستىق قاتىناستى نىعايتۋعا ۇلەس قوسقان مەملەكەتتەر باسشىلارىنا عانا بەرىلەدى. ءسىزدىڭ الەمدىك ءتارتىپتى قامتاماسىز ەتۋگە جانە بەيبىتشىلىكتى قولداۋعا باعىتتالعان قىزمەتىڭىزدى جوعارى باعالايمىز. سونداي-اق يتاليا مەن قازاقستان اراسىنداعى ىنتىماقتاستىقتى دامىتۋعا ۇدايى اتسالىسىپ كەلە جاتقانىڭىز ءۇشىن ريزاشىلىق بىلدىرەمىز. سىزگە تابىستالىپ وتىرعان بۇل ماراپات ءبىزدىڭ رەسپۋبليكامىزعا سىڭىرگەن ەڭبەگىڭىزدىڭ باعاسى، – دەدى يتاليا پرەزيدەنتى.
قاسىم-جومارت توقاەۆ بۇل جوعارى ماراپاتتى زور مارتەبە دەپ اتاپ، سەردجو ماتتارەللاعا ريزاشىلىعىن ءبىلدىردى.
ايتا كەتەيىك، بۇگىن استاناعا يتاليا پرەزيدەنتى سەردجو ماتتارەللا رەسمي ساپارمەن كەلدى.
