سيريا سوتى بۇرىنعى پرەزيدەنت باشار اسادتى سىرتتاي قاماۋعا الۋ تۋرالى وردەر شىعاردى، دەپ حابارلايدى “ادىرنا” ۇلتتىق پورتالى SANA اگەنتتىگىنە سىلتەمە جاساپ.
داماسكىدەگى تەرگەۋ سۋدياسى تاۋفيك ءال-ءاليدىڭ ايتۋىنشا، وردەر 2011 جىلى داراا پروۆينتسياسىندا بولعان وقيعالارعا بايلانىستى بەرىلگەن. اسادقا قاساقانا كىسى ءولتىرۋ، ازاپتاۋ ناتيجەسىندە ادام ولىمىنە اكەلۋ جانە زاڭسىز بوستاندىقتان ايىرۋ ايىپتارى تاعىلىپ وتىر.
سوت شەشىمى ينتەرپول ارقىلى وردەردى تاراتۋعا جانە ءىستى حالىقارالىق دەڭگەيدە قاراۋعا مۇمكىندىك بەرەدى.
بۇل شەشىم 2011 جىلعى 23 قاراشادا داراادا ورىن العان جاپپاي نارازىلىق كەزىندە قازا تاپقانداردىڭ وتباسىلارى بەرگەن شاعىم نەگىزىندە قابىلدانعان. ول كەزدە اساد بيلىگىنە قارسى باستالعان حالىق تولقۋى قاۋىپسىزدىك كۇشتەرى تاراپىنان كۇشپەن باسىپ-جانشىلعان ەدى.
دارااداعى جاعداي 2013 جىلعا دەيىن جالعاسقان قاقتىعىستاردىڭ باسى بولىپ، سيرياداعى زورلىق-زومبىلىقتىڭ كەڭەيۋىنە سەبەپ بولدى.
ەسكە سالا كەتەيىك، باشار اساد 2024 جىلدىڭ جەلتوقسانىندا بيلىكتەن شەتتەتىلىپ، كەيىن وتباسىمەن بىرگە رەسەيدەن ساياسي پانا ىزدەگەن بولاتىن.
