قازاقستاننىڭ سىرتقى ىستەر ءمينيسترى ەرمەك كوشەرباەۆ رەسەيدىڭ توتەنشە جانە وكىلەتتى ەلشىسى الەكسەي بوروداۆكينمەن كەزدەستى، دەپ حابارلايدى "ادىرنا" ۇلتتىق پورتالى قازتاگ-قا سىلتەمە جاساپ.
«قازاقستان رەسپۋبليكاسىنىڭ سىرتقى ىستەر ءمينيسترى ەرمەك كوشەرباەۆ رەسەي فەدەراتسياسىنىڭ ەلشىسى الەكسەي بوروداۆكيندى قابىلدادى. ديپلومات ەرمەك كوشەرباەۆتى قر ءسىم باسشىسى قىزمەتىنە تاعايىندالۋىمەن رەسەيدىڭ سىرتقى ىستەر ءمينيسترى سەرگەي لاۆروۆتىڭ قۇتتىقتاۋىن جەتكىزدى»، – دەلىنگەن حابارلامادا.
كەزدەسۋ بارىسىندا قازاقستاندىق-رەسەيلىك قاتىناستاردىڭ ستراتەگيالىق سەرىكتەستىك پەن وداقتاستىق رۋحىندا جۇيەلى تۇردە دامىپ كەلە جاتقانى اتاپ ءوتىلدى.
اسىرەسە، قازاقستان پرەزيدەنتىنىڭ رەسەيگە مەملەكەتتىك ساپارىنا دايىندىق ماسەلەسىنە نازار اۋدارىلىپ، ونىڭ ەكىجاقتى بايلانىستاردى بارلىق سالادا نىعايتۋداعى ماڭىزى ەرەكشە ەكەنى ايتىلدى.
سونىمەن قاتار تاراپتار ايماقتىق جانە حالىقارالىق كۇن تارتىبىندەگى وزەكتى ماسەلەلەر بويىنشا پىكىر الماستى. كەزدەسۋ قورىتىندىسىندا ەكى ەل حالىقارالىق ارەنادا ءوزارا ءىس-قيمىلدى ۇيلەستىرۋگە جانە كونسترۋكتيۆتى ىنتىماقتاستىقتى جالعاستىرۋعا دايىن ەكەنىن راستادى.
ايتا كەتەيىك، الەكسەي بوروداۆكين 2018 جىلدان بەرى رەسەي فەدەراتسياسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى قىزمەتىن اتقارىپ كەلەدى.
