الماتى وبلىسى تالعار قالاسىنداعى “ايالا” ارناۋلى الەۋمەتتىك قىزمەت كورسەتۋ ورتالىعىنىڭ قىزمەتكەرلەرى نارازىلىققا شىقتى، دەپ حابارلايدى "ادىرنا" ۇلتتىق پورتالى.
ولاردىڭ ايتۋىنشا، بۇعان دەيىن بەس جىلدان استام ۋاقىت بويى ءبىر تاۋلىك جۇمىس ىستەپ، ەكى كۇن دەمالىس كەستەسىمەن 300 مىڭ تەڭگە جالاقى الىپ كەلگەن. الايدا سوڭعى ۋاقىتتا جۇمىس ءتارتىبى وزگەرگەن: ءبىرىنشى تاۋلىكتە – كۇندىزگى اۋىسىم، ەكىنشى تاۋلىكتە – تۇنگى اۋىسىم، ءۇشىنشى كۇنى – دەمالىس. جاڭا جۇيەمەن جالاقى 243 مىڭ تەڭگەگە دەيىن تومەندەپ كەتكەن.
قىزمەتكەرلەر سونىمەن قاتار زەينەتاقى جارنالارىنا قاتىستى دا زاڭ بۇزۋشىلىقتار بار ەكەنىن ايتىپ، اۋديتتىك تەكسەرىس جۇرگىزۋدى تالاپ ەتتى.
ال مەكەمە ديرەكتورى بۇل قىزمەتكە جاقىندا عانا تاعايىندالعانىن ايتىپ، شەشىم ەڭبەك ينسپەكتورىنىڭ ەسكەرتۋلەرىنە بايلانىستى قابىلدانعانىن تۇسىندىرگەن. ول زەينەتاقى جارنالارى مەن جالاقىنىڭ ازايۋىنا قاتىستى ماسەلەنى بىلمەيتىن بولىپ شىقتى جانە ەسەپشىلەردىڭ جۇمىسىن مۇقيات تەكسەرۋگە ۋادە بەردى.
