تاجىكستان پرەزيدەنتى ەمومالي راحمون الەمدىك قاۋىمداستىقتى مۇزدىقتاردىڭ ەرۋى جانە تەڭىز بەن مۇحيت ەكوجۇيەسىنىڭ ناشارلاۋىنا نازار اۋدارۋعا شاقىردى. بۇل تۋرالى ول بۇۇ باس اسسامبلەياسىنىڭ 80-سەسسياسىندا مالىمدەدى، دەپ حابارلايدى «ادىرنا» ءتىلشىسى.
ول بۇگىندە تاجىكستانداعى 14 مىڭ مۇزدىقتىڭ 1300-دەن استامى جويىلىپ كەتكەنىن جەتكىزدى. ايتۋىنشا، ەرۋ پروتسەسى جىلدان-جىلعا كۇشەيىپ جاتىر. ال مۇزدىقتار مەن وزگە دە سۋ كوزدەرى ورتالىق ازياداعى سۋ رەسۋرستارىنىڭ 60%-ىن قۇرايدى.
ء«بىز ادامزاتتىڭ ءومىر كوزى – سۋعا قاتىستى ماسەلەلەردى شەشۋدە بەيجاي قالماۋىمىز كەرەك»، – دەدى راحمون.
ول وسى سالاداعى تاجىكستان ازىرلەگەن باستامالار مەن پراكتيكالىق شارالارعا نازار اۋدارىپ، مۇددەلى مەملەكەتتەردى كەلەسى جىلى وتەتىن «دۋشانبەلىك سۋ پروتسەسىنە» بەلسەندى قاتىسۋعا شاقىردى.
ودان بولەك، تاجىكستان باسشىسى داۋلار مەن قاقتىعىستاردى ساياسي-ديپلوماتيالىق جولمەن شەشۋ قاجەتتىگىن اتاپ ءوتتى. ول پالەستينا داعدارىسىن ەڭسەرۋ جانە تاياۋ شىعىستا بەيبىتشىلىك ورناتۋ تەك بۇۇ قارارلارى مەن «ەكى مەملەكەت» قاعيداسىن ورىنداۋ ارقىلى مۇمكىن بولاتىنىن ايتتى. سونداي-اق راحمون گازا سەكتورىندا اتىستى دەرەۋ توقتاتۋعا جانە جەرگىلىكتى حالىقتى گۋمانيتارلىق كومەكتەن تىس قالدىرماۋعا شاقىردى.
پرەزيدەنت اۋعانستانداعى بەيبىتشىلىك، تۇراقتىلىق، قاۋىپسىزدىك پەن الەۋمەتتىك-ەكونوميكالىق دامۋدى قامتاماسىز ەتۋدىڭ ماڭىزدىلىعىنا دا توقتالدى. ونىڭ ايتۋىنشا، تسيفرلىق تەحنولوگيالاردى جەدەل ەنگىزۋ جانە جاساندى ينتەللەكتىنى دۇرىس پايدالانۋ تۇراقتى دامۋ ماقساتتارىنا جەتۋدە، سونداي-اق ۇجىمدىق قاۋىپسىزدىكتىڭ ماڭىزدى بولىگى سانالاتىن كيبەرقاۋىپسىزدىكتى نىعايتۋدا ۇلكەن ءرول اتقارا الادى. بۇل سالادا بۇۇ قۇرىلىمدارى، اسىرەسە تەرروريزمگە قارسى باسقارما، مۇشە مەملەكەتتەرگە قولداۋدى كۇشەيتۋى قاجەت.
سونداي-اق راحمون ءىرى جانە شاعىن مەملەكەتتەردىڭ تەڭ قۇقىقتارىن قامتاماسىز ەتۋ – جاھاندىق ىنتىماقتاستىقتىڭ باستى قادامدارىنىڭ ءبىرى ەكەنىن ايتتى. ول دامۋشى ەلدەردىڭ، اسىرەسە تاۋلى ايماقتاردا ورنالاسقان جانە تەڭىزگە شىعا المايتىن مەملەكەتتەردىڭ كۇردەلى جاعدايىن ەسكەرىپ، ولاردىڭ تۇراقتى دامۋىن قارجىلاندىرۋ مەن قارجى كوزدەرىنە قول جەتكىزۋىنە جاعداي جاساۋعا شاقىردى.
