اۋعانستاننىڭ قۇندىز قالاسىنان شىققان 13 جاستاعى ءجاسوسپىرىم جولاۋشىلار ۇشاعىنىڭ شاسسي بولىگىنە وتىرىپ، ءۇندىستان استاناسىنا دەيىن ۇشىپ بارعان، دەپ حابارلايدى "ادىرنا" ۇلتتىق پورتالى.
بۇل تۋرالى The Indian Express باسىلىمى حابارلادى.
وقيعا 21 قىركۇيەك كۇنى تاڭەرتەڭ بولعان. ءجاسوسپىرىم كAM Air اۋە كومپانياسىنىڭ كابۋل – نيۋ-دەلي باعىتىنداعى رەيسىنە جاسىرىن كىرىپ كەتكەن. ۇشۋ ۇزاقتىعى 94 مينۋتقا سوزىلعان.
ۇندىستانداعى ينديرا گاندي حالىقارالىق اۋەجايىنا قونعان سوڭ، ول ۇشۋ الاڭىندا جالعىز ءوزى جۇرگەن جەرىنەن تابىلىپ، قاۋىپسىزدىك قىزمەتىنە جەتكىزىلدى. تەكسەرۋ بارىسىندا ءجاسوسپىرىم مۇنداي ارەكەتكە «قىزىعۋشىلىقتان» بارعانىن ايتقان. ونىڭ جوسپارى كابۋلدان تەگەرانعا جەتۋ بولعانىمەن، قاتەلەسىپ دەلي باعىتىنا مىنگەنى بەلگىلى بولدى. ءجاسوسپىرىم ەشقانداي جۇكسىز، جەڭىل كيىممەن ساپار شەككەن.
مامانداردىڭ ايتۋىنشا، مۇنداي جاعدايدا ءتىرى قالۋ ەكىتالاي. سەبەبى جولاۋشىلار ۇشاقتارى ادەتتە 9 مىڭنان 12 مىڭ مەترگە دەيىنگى بيىكتىكتە ۇشادى، ول جەردە تەمپەراتۋرا مينۋس 50 گرادۋسقا دەيىن تومەندەيدى. گەرمەتيكالىق سالوننان ايىرماشىلىعى، ءشاسسيدىڭ ىشكى بولىگى جىلىتىلمايدى ءارى وندا وتتەگى جەتىسپەيدى. مۇنداي جاعدايدا جولاۋشىلاردىڭ 77%-ى كوز جۇماتىنى ايتىلادى. بۇعان قوسا، دوڭگەلەكتىڭ جۇمىس ىستەۋى مەن ۇشۋ كەزىندە قۇلاۋ قاۋپى دە وتە جوعارى.
قازىرگى تاڭدا ءجاسوسپىرىم ءۇندىستان بيلىگىنىڭ قورعاۋىنا الىندى. وقيعاعا بايلانىستى تەرگەۋ جۇرگىزىلىپ جاتىر.
