"تاليبان" قوزعالىسىنىڭ سودىرلارى كابۋلدا ايەلدەردىڭ نارازىلىققا شىققانىن جاريالاعانى ءۇشىن ەكى اۋعان ءجۋرناليسىن ۇرىپ سوققان، - دەپ حابارلايدى “ادىرنا” ۇلتتىق پورتالى Tengrinews.kz سايتىنا سىلتەمە جاساپ.
Reuters اگەنتتىگىنىڭ مالىمەتىنشە، سودىرلار جۋرناليستەردى رەپورتاج جاساپ جاتقان جەرىنەن ۇستاپ، كەيىن ولاردى قامشىمەن اياۋسىز ۇرعان.
Etilaat Roz گازەتىنىڭ نەگىزىن قالاۋشى جانە باس رەداكتورى الەۋمەتتىك جەلىلەردە ەكى ءتىلشىنىڭ سۋرەتتەرىن بولىسكەن. ولاردىڭ ءبىرىنىڭ بەلى مەن اياعىندا ۇلكەن قىزىل ىزدەر بار، ەكىنشىسىنىڭ يىعىندا جانە قولىندا.
"بەس ارىپتەسىمىز تەرگەۋ يزولياتورىندا ءتورت ساعاتتان ارتىق وتىردى، جانە وسى ءتورت ساعات ىشىندە ەكەۋىن ۇرىپ-سوعىپ قاتتى ازاپتاعان", - دەدى رەداكتور.
زارداپ شەككەندەر اۋرۋحاناعا جەتكىزىلدى.
"Etilaat Roz گازەتىنىڭ جۋرناليستەرى تالىپتەر ۇستاعاننان كەيىن سوققىعا جىعىلدى. ەكى ءتىلشىنىڭ باسىندا، بەتىندە جانە دەنەسىندە قامشىنىڭ ىزدەرى بار", - دەلىنگەن رەسمي حابارلامادا.
جاقىندا اۋعان ايەلدەرى ەل باسقارۋعا قاتىستىرۋدى تالاپ ەتىپ نارازىلىققا شىققان بولاتىن. ال، تالىپتەر ۋاقىتشا ۇكىمەتتىڭ قۇرامىن جاريالاپ، ايەلدەر بيلىكتە بولا المايتىنىن ايتقان.
بۇل اۋعان حالقى جاڭا بيلىك ساياساتىنا نارازىلىق بىلدىرگەن العاشقى اكتسيا ەمەس. جەتىنشى قىركۇيەكتە كابۋل تۇرعىندارى پاكىستاننىڭ ۆەدومستۆوارالىق بارلاۋ باسشىسى فايز ءحاميدتىڭ قالاعا كەلۋىنەن كەيىن كوشەگە شىقتى. نارازىلىق بىلدىرۋشىلەردىڭ كوپشىلىگى - ايەلدەر. اكتسيانى تاراتۋ ءۇشىن تالىپتەر وت جاعىپ، قاتىسۋشىلاردى تاياقپەن ۇرعانى تۋرالى حابارلاندى. سول كۇنى نارازىلىقتار كابۋلدىڭ سولتۇستىگىندەگى پارۆان پروۆينتسياسىندا، سونداي-اق ەلدىڭ باتىسىنداعى پروۆينتسيا ورتالىعى گەراتتا بولدى.
