ماڭعىستاۋ وبلىسىندا 18 جاستاعى سارباز سۇلتان شىنتەمىروۆ اسكەردەگى الىمجەتتىكتىڭ سالدارىنان پسيحيكالىق دەنساۋلىق ورتالىعىنا جاتقىزىلدى، دەپ حابارلايدى "ادىرنا" ۇلتتىق پورتالى "ينفورمبيۋروعا" سىلتەپ.
“ينفورمبيۋرو” حابارلاۋىنشا، جىگىتتىڭ تۋىستارى ونىڭ بىرنەشە رەت وزىنە قول سالماق بولعانىن ايتىپ، اسكەري ءبولىم باسشىلىعىن ءىستى جاسىرۋعا تىرىستى دەپ ايىپتاپ وتىر.
ساربازدىڭ اناسى لاۋرا شىنتەمىروۆانىڭ ايتۋىنشا، ۇلىن ءساۋىر ايىندا اسكەرگە كوشەدەن الىپ كەتكەن. سودان بەرى ول ۇلىنىڭ اۋىر جاعدايدا ەكەنىن كەيىنگى كەزگە دەيىن بىلمەي كەلگەن. اسكەري ءبولىم وكىلدەرى العاشىندا ساربازدىڭ جۇرەگى مەن بۇيرەگى سىر بەردى دەپ تۇسىندىرگەن، الايدا كەيىن بالاسىنىڭ پسيحيكالىق ورتالىققا تۇسكەنىن باسقا اتا-انالاردان ەستىپ بىلگەن.
ء«وز بالامدى تانىماي قالدىم. قولىنا جاراقات سالىپ، وزىنە قول جۇمساماق بولعان. اسكەردە ۇرىپ-سوعىپ، قارا جۇمىسقا سالعانىن ايتتى. قۇرىلىسقا جۇمساپ، بىرەۋدىڭ ۇيىندە كىرپىش قۇيعىزعان. 99116 اسكەري ءبولىمىنىڭ تولىق قۇرامىن تەكسەرسىن»، – دەيدى ساربازدىڭ اناسى.
ماڭعىستاۋ وبلىستىق پسيحيكالىق دەنساۋلىق ورتالىعىنىڭ ديرەكتورى ءمادي توقانوۆتىڭ سوزىنشە، شىنتەمىروۆتىڭ بىلەكتەرىندە جاراقات ىزدەرى بولعان.
«بۇل – وزىنە قول سالۋ بەلگىلەرى. وعان پسيحولوگ پەن پسيحوتەراپەۆت مامانداردىڭ كومەگى كورسەتىلۋدە. قازىر ورتالىقتا تاعى ەكى سارباز ەم الىپ جاتىر»، – دەدى ول.
قورعانىس مينيسترلىگى ارنايى كوميسسيا قۇرىپ، وقيعانىڭ ءمان-جايىن انىقتاۋعا كىرىستى.
ايتا كەتەيىك، بۇعان دەيىن الماتى وبلىسىنداعى اسكەري بولىمدە 19 جاستاعى ساربازدىڭ جۇمباق جاعدايدا قازا تاپقانى حابارلانعان بولاتىن.
