كاسپي تەڭىزىندەگى اسكەري وقۋ-جاتتىعۋ كەزىندە قۇتقارىلعان ءۇشىنشى اسكەري قىزمەتشىنىڭ جاعدايى بەلگىلى بولدى. بۇل تۋرالى قورعانىس مينيسترلىگىنىڭ ءباسپاسوز قىزمەتى مالىمدەدى، جەپ حابارلايدى "ادىرنا".
ۆەدومستۆونىڭ مالىمەتىنشە، امان قالعان اسكەري قىزمەتشى – باتىس قازاقستان وبلىسىنىڭ تۇرعىنى نيكيتا ۋدالوۆ. قازىر ول دارىگەرلەردىڭ باقىلاۋىندا. مينيسترلىك ونىڭ جاعدايى جاقسى ەكەنىن حابارلادى.
بۇعان دەيىن وقيعادان امان قالعان تاعى ەكى اسكەري قىزمەتشىنىڭ اتى-ءجونى بەلگىلى بولعان. ولار – اتىراۋ وبلىسىنىڭ تۇرعىنى بەكەت قۋاندىق جانە ماڭعىستاۋ وبلىسىنىڭ تۇرعىنى اقجول تەمىرحان.
اقجول تەمىرحان وقيعادان كەيىن اۋىر جاعدايدا اۋرۋحاناعا جەتكىزىلىپ، جانساقتاۋ بولىمىنە جاتقىزىلعان. كەيىن ەسىن جيىپ، جاعدايى تۇراقتانعان. قازىر ول دا دارىگەرلەردىڭ باقىلاۋىندا.
بەكەت قۋاندىقتىڭ دەنساۋلىق جاعدايى دا قاناعاتتانارلىق. قورعانىس مينيسترلىگىنىڭ مالىمەتىنشە، اسكەري قىزمەتشى مەديتسينالىق باقىلاۋدا.
ەسكە سالايىق، 2026 جىلعى 24 قىركۇيەكتە كاسپي تەڭىزىندەگى اسكەري وقۋ-جاتتىعۋ كەزىندە قايعىلى جاعداي بولىپ، 14 سارباز قازا تاپتى. ءۇش اسكەري قىزمەتشى قۇتقارىلعان.
وقيعاعا بايلانىستى قىلمىستىق ءىس قوزعالىپ، تەرگەۋ امالدارى جۇرگىزىلىپ جاتىر. قىلمىستىق ءىس قىزمەتكە سالعىرت قاراۋ جانە كورابل جۇرگىزۋ قاعيدالارىن بۇزۋ فاكتىلەرى بويىنشا تەرگەلۋدە.
تەرگەۋ اياسىندا قازاقستان رەسپۋبليكاسى قارۋلى كۇشتەرىنىڭ جوعارى جانە اعا كوماندالىق قۇرامىنداعى جاۋاپتى لاۋازىمدى تۇلعالار ۇستالدى. ولار اۋىر زارداپتارعا اكەپ سوققان قىلمىستىق قۇقىق بۇزۋشىلىقتار جاسادى دەگەن كۇدىككە ءىلىندى.
قورعانىس ءمينيسترى، اۆياتسيا گەنەرال-لەيتەنانتى داۋرەن قوسانوۆ كىنالى تۇلعالار زاڭ الدىندا جاۋاپ بەرەتىنىن مالىمدەدى.
قازا تاپقان اسكەري قىزمەتشىلەردىڭ وتباسىلارىنا كومەك كورسەتۋ ماقساتىندا جينالعان قاراجاتتى ارنايى كوميسسيا بولەدى.
قايعىلى وقيعاعا بايلانىستى اقتاۋ قالاسىندا جوسپارلانعان بىرقاتار مەرەكەلىك ءىس-شارا دا وتكىزىلمەيتىنى حابارلانعان بولاتىن.
