بۇگىن ءان الەمىنىڭ اقبايانى، قازاقتىڭ كۇمىس كومەي ءانشىسى - ءمادينا ەراليەۆانىڭ تۋعان كۇنى.
تالاي بويجەتكەننىڭ ءان الەمىنە ەنىپ، ءانشى بولسام دەگەن اياۋلى ارماندار ۇيالاتا بىلگەن ۇستاز ءتىرى بولسا، 70 جاسقا تولار ەدى.
ءمادينا ەسمالايقىزى ەراليەۆا 1954 جىلى تامىز ايىنىڭ ەكىنشى جۇلدىزىندا قىزىلوردا وبلىسى قازالى اۋدانىندا دۇنيەگە كەلگەن.
ءانشى 1974 جىلى قىزىلوردا پەداگوگيكا ۋچيليششەسىنىڭ مۋزىكا ءبولىمىن، 1978 جىلى قازاق مەملەكەتتىك قىزدار پەداگوگيكا ينستيتۋتىنىڭ مۋزىكا فاكۋلتەتىن بىتىرگەن. 1978 — 84 جىلى ادەبيەت جانە ونەر ينستيتۋتىندا قىزمەت ىستەدى.
1985 جىلدان ءومىرىنىڭ سوڭىنا دەيىن الماتى وبلىسى فيلارمونياسىنىڭ جەتەكشى ءانشىسى بولدى. ونەر الەمىندەگى از عانا عۇمىرىندا ۇلكەن بەلەستەردى باعىندىرعان جۇلدىز 1990 جىلى قازاقستاننىڭ ەڭبەك سىڭىرگەن ءارتىسى اتاعىن العان.
وكىنىشكە قاراي، ءانشى 2000 جىلدىڭ كۇزىندە، ياعني 46-دان اسقان شاعىندا جول اپاتىنان قازا تاپتى.
