فلوريداداعى سوت اقش پرەزيدەنتى دونالد ترامپتىڭ New York Times گازەتىنە قارسى بەرگەن ميلليارد دوللارلىق تالاپ ارىزىن ۋاقىتشا قاناعاتتاندىرمادى، دەپ حابارلايدى "ادىرنا" ۇلتتىق پورتالى KAZINFORM-عا سىلتەمە جاساپ.
19 قىركۇيەكتە سۋديا ستيۆەن مەرريدەي 85 بەتتەن تۇراتىن شاعىمنىڭ «تىم ۇزاق» ءارى پروتسەسسۋالدىق تالاپتارعا ساي ەمەس ەكەنىن ايتقان.
اپتا باسىندا ترامپ گازەتتى جانە بىرنەشە ءجۋرناليستى «جالا جاپتى» دەپ ايىپتاپ، ولاردى 2024 جىلعى سايلاۋ الدىندا ادەيى بەدەلىن تۇسىرۋگە ارەكەت جاسادى دەپ مالىمدەگەن بولاتىن. ول كەلتىرىلگەن شىعىندى 15 ميلليارد دوللار دەپ باعالاعان.
New York Times رەداكتسياسى بۇل ايىپتاۋلاردى نەگىزسىز دەپ، تالاپ ارىزدى «تاۋەلسىز جۋرناليستيكانى باسىپ-جانشۋ ارەكەتى» دەپ اتادى. گازەت وكىلدەرىنىڭ ايتۋىنشا، باسىلىم قورىقپاي جۇمىسىن جالعاستىرا بەرەدى جانە جۋرناليستەردىڭ كونستيتۋتسيالىق قۇقىقتارىن قورعاۋدى جالعاستىرادى.
بۇل ترامپتىڭ امەريكالىق ءىرى باق-تارعا قارسى العاشقى زاڭدى ارەكەتى ەمەس. بۇعان دەيىن ول CBS جانە ABC كومپانيالارىنا دا شاعىم ءتۇسىرىپ، ناتيجەسىندە ميلليونداعان دوللارلىق كەلىسىمدەر جاسالعان. ال سىنشىلار ساياساتكەردىڭ مۇنداي قادامدارىن ء«باسپاسوز بوستاندىعىنا جاسالعان قىسىم» دەپ باعالاپ وتىر.
