Air Astana كومپانياسىنىڭ بورتسەرىكەرى جالاقىلارىنىڭ ازدىعىن ايتىپ نارازىلىق ءبىلدىردى، دەپ حابارلايدى "ادىرنا" ۇلتتىق پورتالى Qaz365.kz-كە سىلتەپ.
اۋە كومپانيا قىزمەتكەرلەرى ءوز شاعىمدارىن 12 ماۋسىم كۇنى eotinish پورتالىنا جاريالاعان. الايدا ولار جۇمىستان شىعىپ قالۋدان قورقادى. سەبەبى كومپانيا تالابى بويىنشا ەرەۋىل مەن نارازىلىققا شىعۋعا رۇقسات جوق. ال كومپانيا باسشىسى شاعىمدى كىمنىڭ جولداعانىن ىزدەستىرىپ جاتىر.
"بىزگە ەرەۋىلگە شىعۋعا زاڭمەن تىيىم سالىنعاندىقتان ءوز ماسەلەلەرمىز جايلى باسقاشا ايتا المايمىز. قاتارداعى بورتسەرىكتىڭ ەڭبەكاقىسى 240 مىڭنان 320 مىڭ تەڭگەگە دەيىن قۇرايدى. بۇل رەتتە قر ۇلتتىق ستاتيستيكا بيۋروسىنىڭ دەرەكتەرى بويىنشا 2024 جىلدىڭ ءبىرىنشى توقسانىندا ورتاشا ايلىق اتاۋلى جالاقى 382 279 تەڭگەنى قۇرادى. سونىمەن قاتار، قر ەڭبەك كودەكسىنىڭ 105-بابىنىڭ 1-تارماعىنا سايكەس اۋىر جۇمىستارمەن، زياندى نەمەسە قاۋىپتى ەڭبەك جاعدايلارى بار قىزمەتكەرلەرگە ەڭبەكاقى تولەۋ جوعارى مولشەردە بەلگىلەنەدى", - دەلىنگەن بورتسەرىكتەردىڭ حابارلاماسىندا.
قىزمەتكەرلەر اۋەكومپانيا باسشىلىعى مەن كادر ساياساتىن دا سىنعا الدى.
"بىزدە ۆيتسە-پرەزيدەنتتەر، مەنەدجەرلەر تىم كوپ. شەتەلدىك باسشىلىق بار، ولاردىڭ جالاقىسى قازاقستانداعىداي ەمەس. قازىر كومپانيانىڭ شتاتى 5000-نان اسادى. ال بورت قىزمەكەرلەرى نەبارى 25. بۇل 1 ۇشاققا 200 ادامدى قۇرايدى. كومپانيا ءوزىن ەڭ جاقسى جۇمىس بەرۋشى دەپ قاراستىرعانىمەن، قىزمەتكەرلەر مۇلدە باسقا پىكىردە”، – دەپ قوستى ولار.
ال Air Astana كومپانياسى بورتسەرىكتەر شاعىمىنا بايلانىستى پىكىر دە ءبىلدىردى.
“اۆياكومپانيادا بورتسەرىكتىڭ اي سايىنعى جالاقىسى ار ۇشۋ ساعاتتارىمەن ەسەپتەلەدى. سونىمەن قاتار، ولار ءىسساپاردا بولعان كەزدە تاۋلىكتىك اقى مەن جول اقىسى ءۇشىن قوسىمشا قاراجات الادى. بورتسەرىكتەردىڭ جالاقىسى جانە باسقا دا قوسىمشا تولەمدەر جىل سايىنعى نەگىزدە قايتا قارالادى. جالاقى اۆياكومپانياداعى جۇمىس وتىلىنە جانە كاسىبي ەڭبەگىنە بايلانىستى ەسەپتەلەدى", - دەلىنگەن اۆياكومپانيانىڭ جاۋابىندا.
سونداي-اق، كومپانيانىڭ ءباسپاسوز قىزمەتى جولداعان حابارلامادا ءوز قىزمەتكەرلەرىنىڭ ءىس-ساپارى كەزىندە 4-5 جۇلدىزدى قوناقۇيلەردە تۇرۋىن قامتاماسىز ەتەتىنىن دە قوسا كەتتى.
“ۇشۋ قۇرامىنىڭ ەڭبەك جانە دەمالىس، سونداي-اق زەينەتكە شىعۋ جاعدايلارى قر ەڭبەك زاڭناماسىمەن قاتاڭ رەتتەلگەن. اۆياكومپانيا باسشىلىعى بورتسەرىكتەردىڭ وتىنىشتەرىن نازارعا الادى جانە ەكيپاجدار مەن باسقا دا قىزمەتكەرلەردىڭ ەڭبەك جانە دەمالىس جاعدايلارىن ودان ءارى جاقسارتۋ جونىندەگى جوسپاردى ازىرلەيدى", - دەلىنگەن ۆەدومستۆونىڭ جاۋابىندا.
