Auyl şaruaşylyǧy ministrlıgı Qazaqstanda siyr etınıŋ baǧasynyŋ qymbattauyna qatysty ettıŋ qūny qalai qalyptasatynyn jäne negızsız qymbattaudyŋ aldyn alu üşın qandai şaralar qabyldanyp jatqanyn tüsındırdı, dep habarlaidy "Adyrna" ūlttyq portaly.
Ministrlık mälımetınşe, bır kilogramm siyr etın öndırudıŋ özındık qūny orta eseppen 2 800–3 100 teŋge aralyǧynda. Oǧan 15% köterme üstemeaqy qosylǧanda, baǧa 3 400–3 500 teŋge şamasyn qūraidy.
Degenmen düken sörelerındegı baǧa būdan joǧary boluy mümkın, öitkenı bölşek saudadaǧy qūn tek öndırıstık şyǧyn men üstemeaqyǧa ǧana emes, sonymen qatar satylyp jatqan ettıŋ qai bölıgıne bailanysty özgeredı.
Irı qara maldyŋ bır tūtas etı soiylǧanda, tırı salmaǧynyŋ tek 50–60%-y ǧana taǧamǧa jaramdy bolyp şyǧady. Onyŋ ışınde premium sanattaǧy bölıkter – filei, ribai nemese qazy-qartanyŋ etterı – jalpy kölemnıŋ 15–20%-ynan aspaidy jäne dästürlı türde qymbatqa satylady.
Ortaşa segment şamamen 40–45%-dy qūraidy, al tömengı bölıgıne törtten bırı tiesılı. Al taǧy 15–20%-y süiek, mai jäne et qaldyqtarynan tūrady, olar et retınde satylmaidy. Sondyqtan dükenderdegı baǧa ettıŋ sanaty men sapasyna qarai aitarlyqtai özgeredı: maisyz bölıkter arzanyraq bolsa, jūmsaq et premium sanatyna jatady.
