19 قىركۇيەك كۇنى شىعىس قازاقستان وبلىسى زايسان اۋدانى شىلىكتى اۋىلىنداعى بايگەتوبە قورعانىندا سۇيەگى قايتا جەرلەنگەن ۇلى ساقتار پاتشاسىنىڭ باسىنا بەلگىتاس ورناتىلدى، دەپ حابارلايدى "ادىرنا" ۇلتتىق پورتالى.
«ۇلى ساقتار وركەنيەتىنىڭ وشاعى – شىلىكتى» اتتى بۇل ءىس-شارا ەلىمىزدىڭ تەرەڭ تاريحىن جانە الەمدىك مادەنيەتتىڭ دامۋىنا قوسقان ۇلەسىن ايشىقتاعان ماڭىزدى جيىن بولدى.
بەلگىتاس ورناتۋ ارقىلى قازاقستان اۋماعىنان تابىلعان «التىن ادامداردىڭ» ىشىندە ەرەكشە ورنى بار شىلىكتى دالاسىنىڭ قۇندىلىعى تاعى ءبىر مارتە دارىپتەلدى. ارحەولوگيالىق دەرەكتەرگە سۇيەنسەك، مۇندا ساق-ءۇيسىن ءداۋىرىنىڭ ەكى جۇزدەن استام ەسكەرتكىشى بار. شىلىكتىدەن تابىلعان التىن اشەكەيلەر، اڭ ستيلىندەگى ونەر تۋىندىلارى مەن بەسجۇلدىز بەينەلى تۇيمە ۇلى ساقتار وركەنيەتىنىڭ جوعارى دەڭگەيىن دالەلدەگەن.
جيىندا زەرتتەۋشىلەر بۇل جادىگەرلەردىڭ الەمدىك مادەني مۇراداعى ورنى ەرەكشە ەكەنىن اتاپ ءوتىپ، شىلىكتىنى ەۋرازيا كەڭىستىگىندەگى تەڭدەسى جوق وركەنيەت وشاعى رەتىندە باعالادى.
