قازاقستان پرەزيدەنتى قاسىم-جومارت توقاەۆ بوكس سپورتىن وليمپيادا باعدارلاماسىنا قايتارۋعا ىقپال ەتكەن ايگىلى بوكسشى گەننادي گولوۆكينگە العىس ءبىلدىردى، دەپ حابارلايدى "ادىرنا" ۇلتتىق پورتالى.
مەملەكەت باسشىسى چەمپيونداردىڭ ەل نامىسىن قورعاۋى زور جاۋاپكەرشىلىك ەكەنىن اتاپ ءوتتى. ونىڭ ايتۋىنشا، سپورتتاعى ءاربىر جەڭىس – بۇكىل حالىقتىڭ ابىرويى مەن مەملەكەتتىڭ بەدەلىنىڭ كورسەتكىشى.
ء«بىزدىڭ سپورتشىلار ءاربىر جەتىستىگىمەن ۇلت دەنساۋلىعىن نىعايتۋعا جانە سالاۋاتتى ءومىر سالتىن ناسيحاتتاۋعا ۇلەس قوسىپ كەلەدى. چەمپيون بولۋ – ەلدىڭ داڭقىن ارتتىرۋ. سوندىقتان مەملەكەت ءاردايىم سپورتشىلاردى قولدايدى»، – دەدى پرەزيدەنت بوكستان الەم چەمپيوناتىنىڭ جەڭىمپازدارى مەن جۇلدەگەرلەرىن ماراپاتتاۋ راسىمىندە.
سونىمەن بىرگە قاسىم-جومارت توقاەۆ وليمپياداعا دايىندىقتى قازىردەن باستاۋ قاجەتتىگىن اتاپ ءوتىپ، لوس-اندجەلەستە وتەتىن باستى سپورت دوداسىندا قازاقستاندىقتاردان جوعارى ناتيجە كۇتىلەتىنىن جەتكىزدى.
