2024 جىلى قاڭتاردا الماتىدا بولعان جەر سىلكىنىسى كەزىندە ەرتە ەسكەرتۋ جۇيەسى ىسكە قوسىلماعانى ءۇشىن 3 شەنەۋنىك جازاعا تارتىلدى. سوت كىنالىلەرگە جازا تاعايىندادى، دەپ حابارلايدى “ادىرنا”.
الماتى قالاسى پروكۋراتۋراسى ءمالىم ەتكەندەي، جەر سىلكىنىسى كەزىندە الدىن الا حابارلاۋ جۇيەسىنىڭ جۇمىس ىستەمەۋى كىنالى ادامداردىڭ قىلمىستىق جاۋاپتىلىعىنا اكەلدى.
2024 جىلعى 23 قاڭتاردا الماتى قالاسىندا جەر سىلكىنىسى بولعان. الايدا، بۇرىن ساتىپ الىنعان اۆتوماتتاندىرىلعان الدىن الا ەسكەرتۋ جۇيەسى (ااەج) ءوز دەڭگەيىندە جۇمىسىن اتقارماۋ سالدارىنان حالىق ۋاقتىلى حابارلانباعان.
مەملەكەت باسشىسىنىڭ جانە باس پروكۋروردىڭ تاپسىرماسىنا سايكەس الماتى قالاسىنىڭ پروكۋراتۋراسى الماتى قالاسى بويىنشا توتەنشە جاعدايلار دەپارتامەنتىنىڭ قىزمەتىندەگى اتالعان جۇيەنى ساتىپ الۋدىڭ زاڭدىلىعىنا تەكسەرۋ جۇرگىزىپ، تەكسەرۋ ناتيجەسىندە بيۋدجەت قاراجاتىن جىمقىرۋ بەلگىلەرى انىقتالىپ، سوتقا دەيىنگى تەرگەپ-تەكسەرۋ باستالدى، - دەلىنگەن قالالىق پروكۋراتۋرانىڭ حابارلاماسىندا.
تەرگەۋ بارىسىندا «TNS-INTEC» جشس باس ديرەكتورىنىڭ جەكە پايدا تابۋ نيەتىمەن ساپاسىز جابدىقتى جەتكىزىپ، ورىندالعان جۇمىستاردىڭ جالعان اكتىلەرىن راسىمدەگەنى جانە وسىلايشا اسا ءىرى مولشەردە بيۋدجەت قاراجاتىن جىمقىرعانى انىقتالدى.
اتالعان قىلمىستىق ءىس بويىنشا الماتى گارنيزونىنىڭ اسكەري سوتى ۇكىم شىعاردى.
جابدىقتى قابىلداۋ كەزىندە نەمقۇرايلىق تانىتقانى ءۇشىن الماتى قالاسى توتەنشە جاعدايلار دەپارتامەنتى باسشىسىنىڭ ءۇش ورىنباسارى، سونىمەن بىرگە، جەتكىزىلگەن جابدىقتىڭ ساپاسى مەن سايكەستىگىنە ءتيىستى باقىلاۋ جۇرگىزبەگەن اۆتورلىق جانە تەحنيكالىق قاداعالاۋ وكىلدەرى قىلمىستىق جاۋاپتىلىققا تارتىلدى، - دەپ حابارلادى الماتى قالاسى پروكۋراتۋراسى.
سوت بارلىق ايىپتالۋشىلاردى كىنالى دەپ تانىپ، ولاردى باس بوستاندىعىنان ايىرۋ جانە مەملەكەتتىك ءارى كۆازيمەملەكەتتىك ورگانداردا بەلگىلى ءبىر لاۋازىمداردى اتقارۋ قۇقىعىنان ايىرۋ جازاسىن تاعايىندادى.
