Qazaqstandaǧy eŋ auqatty adamdardyŋ bırı, milliarder Timur Qūlybaevtyŋ Halyk qory 4 million aǧaş otyrǧyzu üşın «Halyk ormany» jobasyna 1 mlrd teŋge investisiia qūidy. Joba Ekologiia ministrlıgımen bırlese otyryp jüzege aspaq, dep habarlaidy «Adyrna» tılşısı.
16 qyrküiekte taraptar yntymaqtastyq turaly memorandumǧa qol qoidy. Aldaǧy uaqytta köşetter «Semei ormany» memlekettık tabiǧi rezervaty, Ile-Alatau ūlttyq parkı jäne elordanyŋ jasyl beldeuı aumaqtaryna egıletın bolady.
Ekologiia jäne tabiǧi resurstar ministrı Erlan Nysanbaevtyŋ aituynşa, būl – elımızdıŋ ekologiialyq qauıpsızdıgı men tūraqty damuy jolyndaǧy strategiialyq bastama.
«63 myŋ gektar jerdı aldaǧy 10 jylda tolyǧymen qalpyna keltıremız dep oilaimyz. Osy bölınıp jatqan qarajatty tiımdı qoldansaq, būnyŋ tigızetın yqpaly osy qorşaǧan ortamyzǧa öte zor»,–dedı ol.
«Halyk» qory Qamqorşylyq keŋesınıŋ müşesı Ümıt Şaiahmetova elımızdıŋ tabiǧi bailyǧyn saqtaudyŋ asa maŋyzdy jūmys ekenın atap öttı.
«Halyk ormany» – būl ekologiialyq qauıpsızdık pen el bolaşaǧyna salynǧan investisiia. Bız memleketpen jäne qoǧammen küş bırıktırıp, ūlt pen bolaşaq ūrpaqtyŋ saulyǧy üşın eŋbek etıp kelemız. Būl joba – keler ūrpaqqa qaldyratyn eŋ qymbat mūramyzdyŋ bırı. Būl jai ǧana aǧaş otyrǧyzu emes, Qazaqstan tabiǧatyn qorǧauǧa jasalǧan maŋyzdy qadam. Qordyŋ qoldauy men qoǧamnyŋ belsendılıgı arqasynda elımızdegı ekologiialyq jaǧdaidy jaqsarta alamyz dep senemın»,—dep pıkır bıldırdı ol.
«Halyk ormany» jobasy – qordyŋ jüielı ekologiialyq jūmysynyŋ jalǧasy. 2025 jylǧy köktemde «GreenAct» ekochellendjı ıske qosylyp, azamattar men ūiymdardyŋ üzdık ekologiialyq bastamalaryn qoldauǧa baǧyttaldy. Jobaǧa eldıŋ jetekşı kompaniialary men belsendılerı qatysyp, ondaǧan tyŋ ideia ūsyndy.
Büǧan deiın prezident Qasym-Jomart Toqaev öz Joldauynda: «Qorşaǧan ortaǧa ūqypty, jauapty ärı janaşyrlyqpen qarau – ūlttyq ideologiiamyzdyŋ ajyramas bölıgıne ainaluy tiıs», – degen bolatyn.
«Halyk ormany» bastamasy Memleket basşysy belgılegen osy mındetterdı jüzege asyryp, «Taza Qazaqstan» ūlttyq tūjyrymdamasyna üles qospaq.
Baǧdarlamanyŋ negızgı mındetterı:
– ekologiialyq tūrǧydan osal aimaqtarda jaŋa orman alqaptaryn qūru,
– örtten zardap şekken aumaqtardy qalpyna keltıru,
– bioaluantürlıktı saqtau jäne ekologiialyq tepe-teŋdıktı qoldau.
Būl bastama 2023 jylǧy mausymda «Semei ormany» rezervatynda bolǧan alapat örtten keiın airyqşa özektı bolyp otyr. Ol kezde 60 myŋ gektardan astam orman janyp ketken edı.
Joba şeŋberınde halyqaralyq jäne qoǧamdyq ūiymdarmen ärıptestık ornatylmaq.
