الماتى وبلىسىنداعى قوقىس پوليگونىنان شىققان ءورت ءۇشىنشى كۇن قاتارىنان توقتاماي تۇر. بۇل تۋرالى تجم ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
مينيسترلىك ءورتتى ءسوندىرۋ جۇمىستارى جالعاسىپ جاتقانىن مالىمدەدى.
«توتەنشە جاعدايلار ءمينيسترى، گەنەرال-مايور شىڭعىس ءارىنوۆتىڭ تاپسىرماسى بويىنشا كەشە كەشكە ءورت ورنىنا ورتكە قارسى قىزمەت كوميتەتىنىڭ توراعاسى ەرلان تورەگەلديەۆ كەلدى. ءىس-قيمىلداردى ۇيلەستىرۋ وقيعا ورنىندا دا، تجم كوماندالىق ورتالىعىنان دا جۇرگىزىلۋدە. پوليگوندا ءورتتى ءسوندىرۋ جۇمىستارىن تاۋلىك بويى جۇزەگە اسىراتىن جەدەل شتاب قۇرىلدى»،—دەلىنگەن حابارلامادا.
قازىرگى تاڭدا ءورت ورنىندا «تەرەڭ-قارا» وزەنىنەن اشىق سۋ كوزىنە اۆتوموبيل-سورعى جەڭىن ورناتۋ ارقىلى ماگيسترالدىق جەلى تارتىلىپ، سۋدى ۇزدىكسىز جەتكىزۋ ۇيىمداستىرىلعان. بۇل جۇمىستارعا 6 بىرلىك تەحنيكا، اتاپ ايتساق، ءبىر اۆتوموبيل-سورعى جەڭى جانە 5 اۆتوتسيستەرنا جۇمىلدىرىلعان.
ءورتتى سوندىرۋگە الماتى، شىمكەنت قالالارى، قاراعاندى، تۇركىستان، جامبىل، جەتىسۋ جانە اباي وبلىستارىنىڭ تجد كۇشتەرى مەن قۇرالدارى، سونداي-اق قر تجم مارتبەك مامراەۆ اتىنداعى 52859 جانە قاسىم قايسەنوۆ اتىنداعى 68303 اسكەري بولىمدەرىنىڭ اسكەري قىزمەتشىلەرى قوسىمشا جۇمىلدىرىلعان.
ء«ورتتى ءسوندىرۋ بويىنشا بارلىق قاجەتتى شارا تجم كۇشىمەن تاۋلىك بويى ورىندالۋدا. كۇندىز-ءتۇنى قۇتقارۋشىلار وشاقتاردى ينەرتتى ماتەريالدارمەن تولتىرىپ، توپىراقتى تىعىزداۋ جۇمىستارىن جۇرگىزۋدە. بۇل ءادىس وتتىڭ بىقسۋىن وتتەگىنىڭ قولجەتىمدىلىگىن تولىعىمەن جاۋىپ، ءورتتىڭ تۇپكىلىكتى جويىلۋىن قامتاماسىز ەتۋگە مۇمكىندىك بەرەدى»،—دەپ تولىقتىردى مينيسترلىكتىڭ ءباسپاسوز قىزمەتى.
