16 قىركۇيەك تۇنگى ساعات 3:00-دە الماتى اۋەجايىندا قازاقستاننىڭ ايەلدەر قۇراماسى ليۆەرپۋلدە وتكەن الەم چەمپيوناتىنان جەڭىسپەن ورالدى.
قىزدار ءۇش التىن، ءبىر كۇمىس جانە ەكى قولا مەدال جەڭىپ الىپ، جالپىكوماندالىق ەسەپتە ءبىرىنشى ورىنعا شىقتى.
بۇل جولى قازاقستاننىڭ اتىن الەمدىك رينگتە جارقىراتىپ، التىننان القا تاققاندار — الۋا بالكيبەكوۆا (51 كگ), ايدا ابيكەەۆا (65 كگ) جانە ناتاليا بوگدانوۆا (70 كگ). الەمدىك دودادا تاجىريبەلى بوكسشى نازىم قىزايباي (48 كگ) كۇمىس مەدالعا قول جەتكىزدى. قولا جۇلدەنى ۆيكتوريا گرافەەۆا (60 كگ) مەن ەلدانا تاليپوۆا (+80 كگ) ەنشىلەپ، قازاقستان قورجىنىنا تاعى دا ابىروي قوستى.
اۋەجايعا سپورت قاۋىمداستىعى، جانكۇيەرلەر مەن سپورتشىلاردىڭ تۋىستارى جينالىپ، چەمپيونداردى ىستىق ىقىلاسپەن قارسى الدى. گۇل شوقتارى مەن قوشەمەت سوزدەرگە بولەنگەن ارۋلار ءوز ەلىنىڭ سەنىمىن اقتاپ، تاريحي جەتىستىككە قول جەتكىزدى.
سپورتشى قىزدار جانكۇيەرلەرگە جانە بۇكىل قازاقستان حالقىنا قولداۋ ءۇشىن العىس ايتىپ، بۇل جەڭىستەر — جاڭا تابىستاردىڭ باستاۋى ەكەنىن جەتكىزدى.
