سولتۇستىك قازاقستان وبلىسىندا ەسىل وزەنىندە بالىق اۋلاپ جۇرگەن قۇتقارۋشى مامونتقا تيەسىلى بولۋى مۇمكىن سۇيەكتى تاۋىپ الدى، دەپ حابارلايدى “ادىرنا” ۇلتتىق پورتالى.
عالىمدار بۇل ولجانى سيرەك كەزدەسەتىن سەنساتسيا دەپ باعالاپ، وزەننىڭ تۇبىندە تۇتاس قاڭقا ساقتالعان بولۋى ىقتيمال ەكەنىن ايتىپ وتىر. جىلىكتىڭ ۇزىندىعى 1 مەتردەن اسادى، سالماعى 15 كەلىگە جۋىق.
سقۋ پروفەسسورى اناتولي پلەشاكوۆتىڭ ايتۋىنشا، سۇيەكتى تجد قىزمەتكەرى اسەت شايكين تاپقان. ول بالىق اۋلاپ جۇرگەن كەزدە سۋدان شىعىپ تۇرعان الىپ سۇيەكتى بايقاپ، كەيىن سۋرەتىن عالىمدارعا جىبەرگەن.
«جەكسەنبى كۇنى بەسكولگە بارعانىمىزدا ول بىزگە ورنىن كورسەتتى. بۇل – ناعىز سەنساتسيا. مامونت سۇيەگى كۇندە تابىلا بەرمەيدى»، – دەيدى پروفەسسور.
الدىن الا مالىمەت بويىنشا، بۇل — 150 مىڭ جىل بۇرىن تىرشىلىك ەتكەن مامونتتىڭ نەمەسە جۇندەس مۇيىزتۇمسىقتىڭ سۇيەگى. عالىمدار بۇل ماڭنان تولىق قاڭقا تابىلۋى مۇمكىن دەپ بولجام جاساپ وتىر.
سۇيەك وبلىستىق تاريحي ولكەتانۋ مۇراجايىنا تاپسىرىلادى. كەلەر جىلى وزەن جاعاسىندا قازبا جۇمىستارى باستاۋى مۇمكىن.
