قازاق ۇلتتىق ۋنيۆەرسيتەتىندە ەرەكشە كورمە ءوتىپ جاتىر

2684
Adyrna.kz Telegram

ءال-فارابي اتىنداعى قازاق ۇلتتىق ۋنيۆەرسيتەتىندە بەلگىلى سۋرەتشى-رەستاۆراتور قىرىم التىنبەكوۆتىڭ 70 جىلدىعىنا ارنالعان «تاريحي-مادەني مۇرا نىساندارىن قالپىنا كەلتىرۋ جانە رەكونسترۋكتسيالاۋ» اتتى حالىقارالىق عىلىمي-تاجىريبەلىك كونفەرەنتسيا ءوتتى.

كونفەرەنتسيادا مادەنيەت جانە سپورت ءمينيسترى د.ا.اباەۆتىڭ، ءال-فارابي قازاق ۇلتتىق ۋنيۆەرسيتەتىنىڭ باسقارما توراعاسى–رەكتورى ج.ق.تۇيمەباەۆتىڭ قۇتتىقتاۋ حاتتارى وقىلدى. سونىمەن قاتار قىرىم التىنبەكوۆكە ۋنيۆەرسيتەتتىڭ «ەرەن ەڭبەگى ءۇشىن» مەدالى تابىستالدى.

كونفەرەنتسيا بارىسىندا قازاقستان سۋرەتشىلەر اكادەمياسىنىڭ پرەزيدەنتى اماندوس اقاناەۆ، مارعۇلان اتىنداعى ارحەولوگيا ينستيتۋتىنىڭ ديرەكتورى اقان وڭعار جانە ورتالىق مەملەكەتتىك مۋزەيدىڭ، «تاڭبالى» قورىق-مۋزەيىنىڭ، «ەسىك» مۋزەيىنىڭ، «بەرەل» مۋزەيىنىڭ ديرەكتورلارى جانە ت.ب. عالىمدار مازمۇندى باياندامالار جاسادى.

ءبۇدان كەيىن قىرىم التىنبەكوۆ رەستاۆراتسيا جاساعان تاريحي-مادەني دۇنيەلەردىڭ ارناۋلى كورمەسى اشىلدى. وندا ەلىمىزدىڭ ەجەلگى جانە ورتاعاسىرلىق تاريحىن پاش ەتەتىن بىرەگەي ارحەولوگيالىق ماتەريالدار ۇسىنىلدى.

اۆتوردىڭ تىلسىم بوياۋعا تولى، ادەمىلىك پەن شەبەرلىك بىتە قايناسقان تۋىندىلارى كوپتىڭ كوزىن ءسۇيىنتتى.

بىرەگەي كوركەم-تاريحي، تىڭ تۋىندىلاردىڭ اراسىندا جارقىراپ كوزگە تۇسەتىن  «ءۇرجار ساۋەگەيى» مەن «تاقساي حانشايىمى» رەكونسترۋكتسيالارى كورمەگە كەلگەن جۇرتتىڭ قىزىعۋشىلىعىن ارتتىردى. سەبەبى، بۇل تۋىندىلارعا كوز جۇگىرتسەڭىز،  سول زامانداعى ارۋلاردىڭ نازىكتىك پەن قايسارلىعىن  ناعىز كوركەم-شەبەرلىكپەن جاساپ شىعارعان. ءبىر قاراعاننان-اق، بار سۇلۋعا ءتان جايدارى مىنەزىمەن بىرگە جۇرەگىندە ءور رۋحى، قايسارلىعى بار ەكەنىن بايقايمىز.

تاريحي تاعىلىمى مول كورمەنى بارشا كورەرمەن قازۇۋ مۋزەيىنەن ءبىر اي بويى تاماشالاي الادى.

 

گۇلميرا سابدەنوۆا،

تاريح عىلىمدارىنىڭ كانديداتى،

ءال-فارابي اتىنداعى قازاق ۇلتتىق ۋنيۆەرسيتەتى دوتسەنتى

"ادىرنا" ۇلتتىق پورتالى

پىكىرلەر