13 قاراشا كۇنى الماتىدا جۋرناليست، بلوگەردىڭ سوتتالعانى تۋرالى اقپارات تارادى، دەپ حابارلايدى "ادىرنا" ۇلتتىق پورتالى.
مەدەۋ اۋداندىق №2 سوتى بەلسەندى، بلوگەر ميربولات مىرزاتايۇلىن قر قىلمىستىق كودەكسىنىڭ 174-بابىنىڭ 1-بولىگى بويىنشا كىنالى دەپ تانىپ، 4 جىلعا باس بوستاندىعىنان ايىرۋ تۋرالى ۇكىم شىعاردى. Facebook الەۋمەتتىك جەلىسىندە ءتۇرلى اقپاراتتار تاراپ جاتىر.
"قازىر عانا جۋرناليست ميربولات مىرزاتايۇلى 4 جىلعا باس بوستاندىعىنان ايرىلدى.
وعان قىلمىستىق كودەكستىڭ 174-ءشى بابىنىڭ 1-ءشى بولىگى (ۇلتارازدىقتى قوزدىرۋ)بويىنشا ايىپ تاعىلدى.
ميربولاتتىڭ ءتورت بالاسى بار، ونىڭ ەكەۋى كامەلەتتىك جاسقا تولماعاندار.
سوڭعى ساتكە دەيىن شارتتى جازامەن بوساتار دەگەن ءۇمىت بولدى، بىراق ءۇمىت اقتالمادى.
ميربولات سوڭعى سوزىندە: ”مەنى سوتتاۋ - قازاق ءتىلىن سوتتاۋ”-دەپ قاداپ ايتتى", - دەپ جازدى بەلسەندى ابزال دوستيار.
ەسكە سالايىق، 2 قىركۇيەكتە بلوگەردىڭ تۋىستارى ونىڭ جوعالىپ كەتكەنىن ايتىپ، الەۋمەتتىك جەلىلەردە دابىل قاققان ەدى. كەيىن بەلگىلى بولعانداي، ونى قۇقىق قورعاۋ ورگاندارى ۇستاعان.
ال 3 قاراشا كۇنى جۋرناليست جەلىدەگى پاراقشاسىندا جارىس ءسوزدىڭ باستالعانىن جازدى.
