اقتاۋ قالاسىنداعى نازارباەۆ زياتكەرلىك مەكتەبىنىڭ 11-سىنىپ وقۋشىسى جاسمين ۆادوداريانىڭ عىلىمي جۇمىسى حالىقارالىق بەدەلدى اكادەميالىق باسىلىم OxJournal جۋرنالىندا جاريالاندى، دەپ حابارلايدى "ادىرنا" ۇلتتىق پورتالى.
وقۋشىنىڭ ەڭبەگى «The Diplomacy of Unequals: Power Asymmetries in Global Climate Diplomacy» («تەڭسىزدەردىڭ ديپلوماتياسى: جاھاندىق كليماتتىق ديپلوماتياداعى بيلىك اسيممەترياسى») دەگەن اتاۋمەن شىقتى.
جاسمين زەرتتەۋىندە كليمات ماسەلەسىنە قاتىستى كەلىسسوزدەردە مىقتى مەملەكەتتەردىڭ ىقپالى ءالسىز ەلدەردەن باسىم تۇسەتىنىن، بۇل قابىلداناتىن شەشىمدەردىڭ ادىلدىگىنە اسەر ەتەتىنىن اتاپ وتكەن. سونىمەن قاتار حالىقارالىق ىنتىماقتاستىقتى ءادىل ءارى تەڭگەرىمدى ەتۋ جولدارىن دا ۇسىنعان.
بۇل جەتىستىككە وقۋشىنىڭ 2025 جىلى مامىر ايىندا Oxford Scholastica حالىقارالىق ەسسە بايقاۋىندا جەڭىمپاز اتانۋى جول اشتى. ول «جازۋ جانە جۋرناليستيكا» نوميناتسياسىندا ءبىرىنشى ورىن الىپ، قۇنى 995 فۋنت ستەرلينگ تۇراتىن تولىق وقۋ گرانتىن يەلەنگەن. وسى گرانت اياسىندا جاسمين جازعى ونلاين-اكادەميالىق باعدارلاماعا قاتىسىپ، وكسفورد ۋنيۆەرسيتەتىنىڭ تۇلەگىنىڭ جەتەكشىلىگىمەن ءتۇرلى ەلدەردەن كەلگەن دارىندى جاستارمەن بىرگە جۇمىس ىستەگەن. باعدارلامانى اياقتاعان سوڭ ول عىلىمي ماقالاسىن جازىپ، حالىقارالىق جۋرنالعا جولداعان.
مەكتەپ وكىلدەرى ءجاسميندى جانە ونىڭ جەتەكشىسى مادينا ءجۇسىپوۆانى قۇتتىقتاپ، عىلىم مەن ءبىلىم جولىندا جاڭا تابىستار تىلەدى.
