قاراعاندى وبلىسىنىڭ پوليتسيا قىزمەتكەرلەرى رەسپۋبليكالىق ماڭىزى بار اۆتوجولداردا كولىك جۇرگىزۋشىلەرىمەن پروفيلاكتيكالىق اڭگىمەلەر جۇرگىزىپ، كەزەكتى رەيد جۇرگىزدى، دەپ حابارلايدى “ادىرنا”.
اقپاراتقا سايكەس، شارا بارىسىندا جولدا ۇزاق ۋاقىت جۇرگەن، شارشاعان ءارى ۇيقىلى جۇرگىزۋشىلەرگە ەرەكشە نازار اۋدارىلدى. مۇنداي جاعدايلاردا ولاردىڭ ءارى قاراي جۇرۋىنە جول بەرىلمەي، دەمالىپ الۋ ءۇشىن ءماجبۇرلى تۇردە توقتاتىلدى.
پاترۋلدىك پوليتسيا باتالونىنىڭ كومانديرى مەدەت نۇرمۇحانوۆتىڭ ايتۋىنشا، بۇل – جول-كولىك وقيعالارىنىڭ الدىن الۋدىڭ ءتيىمدى تاسىلدەرىنىڭ ءبىرى.
ستاتيستيكالىق مالىمەتتەرگە سايكەس، جىل باسىنان بەرى وبلىس اۋماعىندا 482 جول-كولىك وقيعاسى تىركەلىپ، سونىڭ سالدارىنان 96 ادام كوز جۇمعان. ونىڭ ىشىندە 50-دەن استام وقيعا جۇرگىزۋشىلەردىڭ ۇيىقتاپ كەتۋىنەن بولعان.
“سوندىقتان دا شارشاعان، ۇيقىلى جۇرگىزۋشىلەردى ۋاقىتىلى توقتاتۋ – ادام ءومىرىن ساقتاپ قالۋعا ىقپال ەتەتىن باستى شارالاردىڭ ءبىرى”، – دەدى مەدەت نۇرمۇحانوۆ.
رەيد بارىسىندا قاراعاندى — بالقاش باعىتىندا 15 كولىك توقتاتىلىپ، جۇرگىزۋشىلەردىڭ ءارى قاراي جولعا شىعۋىنا ۋاقىتشا شەكتەۋ قويىلدى.
“قازاقستاندا ءبىزدى پوليتسيا قىزمەتكەرلەرى توقتاتىپ، شارشاساق دەمالۋىمىزدى ءوتىندى. بۇل وتە دۇرىس. ويتكەنى كوپتەگەن جول-كولىك وقيعاسىن كورىپ ءجۇرمىز. پوليتسيا ءتۇن ىشىندە ءبىزدىڭ قاۋىپسىزدىگىمىزدى ويلاپ، جولعا شىقپاۋدى سۇراپ جاتىر. پوليتسيانىڭ بارىنا راقمەت”، — دەدى وزبەكستان ازاماتى احروربەك كامباروۆ.
قاراعاندى وبلىسى پوليتسيا دەپارتامەنتى باستىعىنىڭ ورىنباسارى جاسقايرات قايىروۆتىڭ ايتۋىنشا، بۇل باستاما جۇرگىزۋشىلەردىڭ قاۋىپسىزدىگى ءۇشىن جاسالىپ وتىر.
“جۇرگىزۋشىلەردىڭ قاۋىپسىزدىگىن قامتاماسىز ەتۋ ماقساتىندا ءبىز وبلىس پروكۋراتۋراسىمەن بىرلەسىپ، جاڭا جۇيەنى ەنگىزبەكپىز. ياعني 8 ساعاتتان ارتىق جول جۇرگەن جۇرگىزۋشىلەر تۋرالى اقپارات اۆتوماتتى تۇردە پوليتسيا قىزمەتكەرلەرىنىڭ پلانشەتتەرىنە تۇسەدى. ۋاقىتىنان ارتىق جۇرگەن جاعدايدا، ءبىز ولاردى توقتاتىپ، ءارى قاراي دەمالعانعا دەيىن جولعا شىعارمايمىز. قاراعاندى توعىز جولدىڭ تورابى بولعاندىقتان، كولىكتەر كوبىنە ءتۇن ورتاسى نەمەسە تاڭعى ۋاقىتتا كەلەدى. ءدال وسى مەزگىلدە ۇيىقتاپ كەتۋ قاۋپى جوعارى بولادى. ەگەر جۇيە تولىق ىسكە قوسىلسا، جول-كولىك وقيعالارىنىڭ ەداۋىر ازاياتىنىنا سەنەمىز”، – دەدى جاسقايرات قايىروۆ.
