فوتو: altaynews.kz
رەسەيدىڭ اباكان قالاسىنان شىققان اڭشىلار توبى اڭ اۋلاۋعا بارعان كەزدە قايعىلى جاعداي ورىن الدى. ءبىر اڭشىنىڭ قاتەلىكپەن جاساعان وعى ادام ولىمىنە سەبەپ بولدى. اقپاراتتى رەسەي تەرگەۋ كوميتەتىنىڭ كراسنويار ولكەسى مەن حاكاسيا رەسپۋبليكاسىنداعى باس تەرگەۋ باسقارماسى تاراتتى، دەپ حابارلايدى “ادىرنا” ۇلتتىق پورتالى Liter.kz سايتىنا سىلتەپ.
اقپاراتقا سايكەس، كەشكى ۋاقىتتا اڭشىلار ەكى توپقا ءبولىنىپ، ءارتۇرلى سوقپاقتارمەن كەتكەن. ىمىرت تۇسكەن شاقتا ولاردىڭ ءبىرى قالىڭ ءشوپ اراسىنداعى قوزعالىستى بايقاپ، ونى جابايى اڭ دەپ ويلاپ، وق اتقان. سالدارىنان 48 جاستاعى توپ جەتەكشىسى قازا تاپتى.
مارقۇمنىڭ جولداستارى العاشقى كومەك كورسەتىپ، قۇتقارۋشىلاردى شاقىرعانىمەن، ونىڭ ءومىرىن ساقتاپ قالۋ مۇمكىن بولمادى.
قازىرگى ۋاقىتتا تەرگەۋ امالدارى جۇرگىزىلۋدە. اتالعان فاكتى بويىنشا «ابايسىزدا ادام ولىمىنە سەبەپ بولۋ» بابىمەن قىلمىستىق ءىس قوزعالدى.
