Änşı Alla Pugachiova jurnalist Katerina Gordeevaǧa bergen sūhbatynda özınıŋ balalyq şaǧy, otbasy tarihy men bauyrynyŋ qasırettı taǧdyry turaly alǧaş ret aşyq aitty, dep habarlaidy "Adyrna" ūlttyq portaly Orda.kz-ke sılteme jasap.
Änşınıŋ sözınşe, onyŋ tuǧan aǧasy keŋes däuırınde Qazaqstanda äskeri qyzmet atqaryp, Semeidegı iadrolyq poligonda radiasiiaǧa ūşyraǧan. Būl jaǧdai bükıl otbasynyŋ taǧdyryna auyr äser etken.
«Äuelı aǧam äskeri qyzmette boldy, bailanys salasynyŋ myqty mamany edı. Semeide, Qytai şekarasynda qyzmet etıp jürıp säule tidı. Keiın balalary ölı tua bastady. Sodan soŋ ony äldebır sebeppen Auǧanstanǧa jıberdı», — dep eske aldy Pugachiova.
Änşınıŋ aituynşa, aǧasy bala kezınen öte daryndy, tıl üirenuge qabılettı bolǧan. Ol äskeri şet tılder institutyna tüsuge niettengenımen, sausaǧyndaǧy kemıstık saldarynan qabyldanbaǧan.
«Barlyq emtihanyn üzdık tapsyrǧan edı. Bıraq institutqa almai qoiǧany ülken qasıret boldy. Sol kezde jüikesı syr berıp, ışımdıkke salynyp kettı», — dedı ol.
Keiın aǧasy äskeri bailanys uchilişesıne jıberılıp, armanyn jüzege asyra almasa da, bılıktı äskeri maman bolǧan.
«Şyn mänınde öte talantty jan edı… Onyŋ taǧdyry men radiasiia saldary bükıl otbasymyzǧa auyr soqqy boldy», - dep tolǧandy Pugachiova.
Būl Pugachiovanyŋ Reseiden ketkennen keiın bergen alǧaşqy keŋ kölemdı sūhbaty. Änşı özınıŋ şetelge köşu sebebın de tüsındırdı.
Onyŋ sözınşe, jūbaiy Maksim Galkinge «şetel agentı» degen aiyp taǧylyp, otbasyna qudalau jasalǧan. Balalary mektepte bullingke ūşyraǧan.
«Ar-ojdan daŋqtan qymbat. Men şyndyqty aitu üşın ketuge mäjbür boldym», — dedı ol.
Primadonna sūhbat barysynda soǧysty da, bilıktıŋ şeksızdıgın de synǧa aldy. Söz bostandyǧy — ärbır azamattyŋ qūqyǧy ekenın atap öttı.
«Özımızdıŋ de, özge eldıŋ de adamdarynyŋ qazasy — tözuge bolmaityn qaiǧy», — dedı Pugachiova.
Änşı balalyq şaǧyndaǧy joqşylyq, maidanger äkesınıŋ taǧdyry, aǧasynyŋ qasırettı ömır joly, sondai-aq şyǧarmaşylyq biıkke qalai jetkenın de eske aldy. Ol «Arlekino» änınen bastap «Zolotoi Orfeidegı» jeŋısın, Chernobyl apatyn joiuşylarǧa arnalǧan konsertterın de baiandady.
