جاقىندا تۇركىستان وبلىسىندا ەر ادام ءوزىنىڭ قارت اكەسىن ۇرىپ ولتىرگەنى تۋرالى اقپارات قىزۋ تالقىعا ءتۇستى. بۇگىن كۇدىكتىنىڭ ايەلىنە قاتىستى دا قىلمىستىق ءىس قوزعالعانى بەلگىلى بولدى. بۇل تۋرالى وبلىستىق پوليتسيا دەپارتامەنتى مالىمدەدى، دەپ حابارلايدى “ادىرنا”.
بۇعان دەيىن الەۋمەتتىك جەلىدە ەر ادام قارت ادامدى ۇرىپ-سوعىپ جاتقان بەينەجازبا تاراعان بولاتىن. ۆيدەودا قاريانىڭ بەتى قانعا بويالعانى انىق كورىنەدى. اقساقال ورنىنان تۇرا الماعان سوڭ، بالاسى ايەلىن شاقىرىپ الىپ، ەكەۋى اقساقالدى سۇيرەپ الىپ كەتەدى.
كەيىن قاريانى بالاسى ۇرىپ-سوققانى انىقتالدى. ال ايەلى ونى توقتاتپاعان. بەينەجازبانى كورشىسى جاسىرىن ءتۇسىرىپ العان.
پوليتسيا دەپارتامەنتىنەن حابارلاعانداي، اكەسىنىڭ ولىمىنەن كەيىن ۇلىنا قاتىستى قك-ءنىڭ 106-بابى 3-بولىگىنىڭ "زارداپ شەگۋشىنىڭ ولىمىنە اكەپ سوققان دەنساۋلىققا قاساقانا اۋىر زيان كەلتىرۋ" بويىنشا قىلمىستىق ءىس قوزعالدى. كۇدىكتى ۇستالىپ، ۋاقىتشا ۇستاۋ يزولياتورىنا قامالدى.
سونداي-اق ۇلىنىڭ ايەلىنە قاتىستى تەرگەۋ جۇرگىزىلۋدە. قىلمىستىق ءىس قك-ءنىڭ 3-بابى 2-بولىگىنىڭ 109-1-تارماعى بويىنشا "كىنالىگە كورىنەۋ دارمەنسىز كۇيدە نە كىنالىگە ماتەريالدىق نەمەسە وزگە دە تاۋەلدىلىكتە بولعان ادامدى ۇرىپ-سوعۋ" بويىنشا قوزعالدى.
"سوتقا دەيىنگى تەرگەۋ بارىسىندا وقيعانىڭ بارلىق ءمان-جايلارىن انىقتاۋعا باعىتتالعان بارلىق قاجەتتى تەرگەۋ ارەكەتتەرى جۇرگىزىلەتىن بولادى. ولاردىڭ ناتيجەلەرى بويىنشا ءتيىستى ءىس جۇرگىزۋ شەشىمى قابىلداناتىن بولادى. سونىمەن بىرگە تەرگەۋ بارىسىندا وتىنىشتە باياندالعان بارلىق دالەلدەر تەكسەرىلەدى جانە ول اياقتالعاننان كەيىن قىلمىستىق پروتسەستىڭ بارلىق قاتىسۋشىلارىنىڭ ءىس-ارەكەتتەرىنە قۇقىقتىق باعا بەرىلەدى ", – دەپ حابارلادى تۇركىستان وبلىسى پد.
پوليتسيا حابارلاعانداي، جاقىندارى تاراپىنان ۇرىپ-سوعۋ زەينەتكەردىڭ ولىمىنە اكەلىپ سوقتىرعانشا جابىرلەنۋشىدەن نەمەسە باسقا ادامداردان ورگاندارعا زورلىق-زومبىلىق فاكتىلەرى بويىنشا ارىز تۇسپەگەن.
