16 قىركۇيەكتەن باستاپ جۇرگىزۋشىلەردىڭ ماستىعىن تەكسەرۋ ەرەجەلەرى جاڭارادى. بۇل وزگەرىستەر جاياۋ جۇرگىنشىلەرگە دە قاتىستى بولماق، دەپ حابارلايدى “ادىرنا”.
29 تامىزدا "نقا-نىڭ ەتالوندىق باقىلاۋ بانكى" پورتالىندا ءىىم-ءنىڭ جاڭا بۇيرىعى جاريالاندى. قۇجاتتا "جول قوزعالىسىنا قاتىسۋشىلاردى ماس كۇيىندە بولۋىنا تەكسەرۋ ءتارتىبى" انىق كورسەتىلگەن.
بۇرىنعى ەرەجە تەك كولىك جۇرگىزۋشىلەرى مەن شاعىن كولىك باسقارۋشىلارعا قاتىستى بولسا، جاڭا ەرەجەدە تەكسەرۋگە جول قوزعالىسىنا قاتىسۋشىلار، ياعني جاياۋ جۇرگىنشىلەر مەن موپەد جۇرگىزۋشىلەرى دە ەنۋى مۇمكىن ەكەنى كورسەتىلگەن. الايدا ولار انىق ماس كۇيىندە بولسا، قانداي جازا قولدانىلاتىنى بەلگىسىز.
جاڭا ەرەجەگە سايكەس، تەكسەرۋگە جولداما ەلەكتروندى تۇردە راسىمدەلەدى. كۋاگەرسىز تەكسەرۋگە بولادى، بىراق مىندەتتى تۇردە: ۆيدەو نەمەسە اۋديو جازبا جاسالۋى كەرەك. ادامنىڭ جازباشا كەلىسىمى قاجەت.
"ەگەر جول قوزعالىسىنا قاتىسۋشى ادام تەكسەرۋدى كۋاگەرسىز وتكىزۋگە نەمەسە ونىڭ ناتيجەسىنە كەلىسپەسە، ول مەملەكەتتىك مەديتسينالىق مەكەمەگە جىبەرىلەدى", – دەلىنگەن جاڭا ەرەجەدە.
ماس كۇيدە كولىك جۇرگىزگەندەرگە:
- 15 تاۋلىككە قاماۋ، 7 جىلعا جۇرگىزۋشى كۋالىگىنەن ايىرۋ
- ەگەر بىرەۋگە زيان كەلسە – 20 تاۋلىككە قاماۋ، كۋالىگىنەن 7 جىلعا ايىرۋ
- قايتالانسا – 25 تاۋلىككە قاماۋ، كۋالىگىنەن 9 جىلعا ايىرۋ جازاسى قاراستىرىلادى.
كەيبىر جۇرگىزۋشىلەر جازانى جەڭىلدەتۋدى سۇراعان. دەپۋتاتتار دا مۇنى قولدادى. بىراق ءىىم بۇل ۇسىنىستى قابىلدامادى. ياعني، جازا وزگەرمەيدى.
