اقتوبە وبلىسىندا ەكى ەسەپشى ونداعان جۇكتى ايەلدى جالعان كاسىپكەر رەتىندە تىركەپ، مەملەكەتتەن ميلليونداعان الەۋمەتتىك تولەم الىپ بەرگەن، دەپ حابارلايدى «ادىرنا» ۇلتتىق پورتالى.
2023–2024 جىلدارى ايىپتالۋشىلار ونداعان ايەلدى دەكرەتكە شىعارار الدىندا بىردەن بىرنەشە جەكە كاسىپكەرلىككە راسىمدەگەن. وسىلايشا، الەۋمەتتىك اۋدارىمدار جاسالىپ، ءاربىر «كليەنتكە» 3,9–4 ملن تەڭگە كولەمىندە جۇكتىلىك جانە بوسانۋعا بايلانىستى جاردەماقى، سونداي-اق اي سايىن 170–200 مىڭ تەڭگە كولەمىندە تولەم تاعايىندالعان.
تەرگەۋ مالىمەتىنشە، ءبىر ايەل ءتىپتى 19 ءتۇرلى جەكە كاسىپكەر رەتىندە تىركەلگەن. جالعان قۇجاتتار مەن كاسسالىق وردەرلەردى راسىمدەۋ ارقىلى ولار اقشا اۋدارىمدارىن زاڭدى ەتىپ كورسەتكەن. الىنعان قارجىدان بۋحگالتەرلەر 500 مىڭ تەڭگەدەن استام «قىزمەت اقىسىن» الىپ وتىرعان.
جالپى شىعىن كولەمى – 98 ملن تەڭگە. ونىڭ 25 ملن تەڭگەسى سوتقا دەيىن قايتارىلدى، قالعان سوما الەۋمەتتىك ساقتاندىرۋ قورى تاراپىنان ازاماتتىق سوتتا وندىرىلمەك.
سوت ۇكىمىمەن ەسەپشىلەر 6 جىلعا باس بوستاندىعىنان ايىرىلدى.
سونىمەن قاتار ولاردىڭ مۇلكى تاركىلەنىپ، 5 جىل بويى بۋحگالتەرلىك قىزمەتپەن اينالىسۋىنا تىيىم سالىندى. الايدا كامەلەتكە تولماعان بالالارىنىڭ جاعدايىنا بايلانىستى ۇكىمنىڭ ورىندالۋى 5 جىلعا شەگەرىلدى.
