ورال قالاسىنداعى اتامەكەن ونەر ورداسىنىڭ كورمە زالىندا جاس فوتوگراف، «ۇركەر» ۇلتتىق سىيلىعىنىڭ يەگەرى مەيىربەك تاجقۇرانوۆتىڭ «ادام. ەڭبەك. ءولكە.» اتتى جەكە فوتو كورمەسى اشىلدى. شارانى «جايىق پرەسس» مەديا حولدينگى قولداپ, ۇيىمداستىرىپ وتىر.
فوتوسۋرەت ونەرىنە مەكتەپ جاسىنان قىزىعۋشىلىق تانىتىپ, ونى كاسىبي دەڭگەيگە دەيىن جەتىلدىرگەن مەيىربەك بۇگىندە ەلىمىزدىڭ فوتوونەر سالاسىندا ءوز قولتاڭباسىن قالىپتاستىرىپ ۇلگەرگەن. ونىڭ ەڭبەكتەرى ەل ىشىندەگى ءتۇرلى ءالەۋمەتتىك جوبالارمەن قاتار, حالىقارالىق بايقاۋلاردا دا جوعارى باعالانىپ ءجۇر.
فوتو كورمەنىڭ نەگىزگى ماقساتى – ەل ەكونوميكاسىنىڭ تىرەگى سانالاتىن جۇمىسشى ماماندىق يەلەرىنىڭ ەڭبەگىن ناسيحاتتاۋ. بۇل باستاما قازاقستاندا 2025 جىل — جۇمىسشى ماماندار جىلى دەپ جاريالانۋىنا وراي جۇزەگە اسىپ وتىر. ەكسپوزيتسيادا مەيىربەكتىڭ 8 اي بويى ەل ارالاپ, ءارتۇرلى سالادا ەڭبەك ەتىپ جۇرگەن ادامداردىڭ تىنىس-تىرشىلىگىن بەينەلەگەن 80-گە جۋىق فوتو جۇمىسى قويىلعان.
— «قازىر جۇمىسشى ماماندىقتار ەلەۋسىز قالىپ بارادى. ءبىز ەسترادا جۇلدىزدارىن, تانىمال ادامداردى تانيمىز, ال ەلگە شىن پايداسى ءتيىپ جۇرگەن قاراپايىم ەڭبەك ادامدارى نازاردان تىس قالىپ جاتادى. وسى ارقىلى سول ازاماتتاردىڭ ەڭبەگىن ەلگە تانىتقىم كەلدى», – دەيدى اۆتور.
كورمەدە سونىمەن قاتار قازاقتىڭ ءبىرتۋار تۇلعالارى — عۇمار قاراشتىڭ 150 جىلدىعى مەن اباي قۇنانبايۇلىنىڭ 180 جىلدىعىنا ارنالعان ارنايى فوتوجوبالار دا كوپشىلىك نازارىنا ۇسىنىلعان. سونداي-اق الەمدىك بايقاۋلاردا ۇزدىك 50 جانە ۇزدىك 100 سۋرەت قاتارىنان كورىنگەن شىعارمالار دا ورىن تاپقان.
كورمە قىركۇيەك ايىنىڭ 30-نا دەيىن جالعاسادى. كىرۋ - تەگىن. 
