23 جاستاعى ەلوردا تۇرعىنى الەۋمەتتىك جەلىگە قارۋمەن تۇسكەن سۋرەتىن جاريالاپ، تۇرعىنداردى شوشىتتى. پوليتسيا سوتقا دەيىنگى تەرگەۋ جۇرگىزىپ جاتىر، دەپ حابارلايدى "ادىرنا" ۇلتتىق پورتالى.
ەر ادامنىڭ ۆك الەۋمەتتىك جەلىسىندەگى جازبالارى قولدانۋشىلاردى ۇرەيلەندىردى. سۋرەتتەردىڭ بىرىندە اۆتور قارۋلانعان اسكەري فورمادا بولدى. ول ءوز جازباسىندا «ەرتەڭ نۇر-سۇلتاندا قىزىق بولادى» دەگەن سوزدەر قالدىردى.
ءتارتىپ ساقشىلارىنىڭ ايتۋىنشا، جازبا مەن سۋرەت اۆتورى - استانا قالاسىنىڭ 23 جاستاعى تۇرعىنى.
«25 ماۋسىمدا» ۆكونتاكتە «الەۋمەتتىك جەلىسىنىڭ قولدانۋشىسى ءوز پاراقشاسىندا قارۋ-جاراقپەن فوتوسۋرەتتەردى جاريالادى. جاس جىگىت اسكەري فورما كيگەن. سونىمەن قاتار، 102 كانالىنا قالا تۇرعىنىنان، ونىڭ ۇلىنا الەۋمەتتىك جەلىدەگى بەلگىسىز ادامنان قارۋمەن تۇسكەن سۋرەتتەر كەلىپ جاتقاندىعى تۋرالى حابارلاما كەلىپ ءتۇستى. قارۋى بار ادامنىڭ سۋرەتىنىڭ استىندا «ەرتەڭ ەلوردادا قىزىق بولادى» دەگەن حابارلاما بار، دەپ ءتۇسىندىردى نۇر-سۇلتان پوليتسيا بولىمىندە.
ەر ادام ۇستالىپ، پوليتسياعا جەتكىزىلدى.
«جاس جىگىتتىڭ ايتۋى بويىنشا، ول سترايكبولدى جاقسى كورەدى جانە بۇل جازبانى ءوزىنىڭ ۆكونتاكتە جەلىسىندەگى پاراقشاسىندا جازىلۋشىلاردىڭ سانىن كوبەيتۋ ماقساتىندا جازعان، ءىس شەڭبەرىندە اتىس قارۋىنا تيەسىلىگىن انىقتاۋ ءۇشىن بالليستيكالىق ساراپتاما تاعايىندالدى»، دەدى پوليتسيا.
كەيىنىرەك ءتارتىپ ساقشىلارى بالليستيكالىق ساراپتاما قورىتىندىسى بويىنشا بۇل قارۋ سترايكبول ويناۋعا ارنالعان دەپ تولىقتىردى.
پوليتسيا قارۋدى زاڭسىز الۋ، بەرۋ، ساتۋ جانە ساقتاۋ بويىنشا قىلمىستىق جاۋاپكەرشىلىككە تارتىلاتىنىن ەسكەرتەدى.
"ادىرنا" ۇلتتىق پورتالى
