وسكەمەن قالاسىنىڭ تۇرعىنى ءوزىنىڭ فوتوسۋرەتىن الەۋمەتتىك جەلىدە كەلىسىمىنسىز جاريالاپ، ار-نامىسىنا تيەتىن مالىمەتتەر تاراتقان ازاماتتاردى سوتقا بەردى. بۇل تۋرالى 30 قىركۇيەكتە جوعارعى سوت جازدى، دەپ حابارلايدى «ادىرنا» ءتىلشىسى.
ءىس ماتەريالدارىنا سايكەس، Instagram جەلىسىندەگى ەكى قولدانۋشى ايەلدىڭ سۋرەتىن ادەپسىز پىكىرلەرمەن بىرگە جاريالاپ، ونىڭ مىنەز-قۇلقى تۋرالى دالەلسىز ايىپتاۋلار ايتقان. جاريالانىم اۆتورلارى مۇنى «جەكە پىكىر» دەپ تۇسىندىرۋگە تىرىسقانىمەن، سوت ولاردىڭ ءۋاجىن قابىلداماعان.
سوت ناقتى ادامعا قاتىستى ايتىلعان مۇنداي مالىمدەمەلەر دالەلدەمەلەرمەن راستالۋى ءتيىس ەكەنىن اتاپ ءوتتى. الايدا جاۋاپكەرلەر ءوز سوزدەرىنىڭ راستىعىن دالەلدەي الماعان. سونىمەن قاتار، فوتوسۋرەتتى يەسىنىڭ كەلىسىمىنسىز جاريالاۋ ازاماتتىڭ قۇقىقتارىن بۇزۋ دەپ تانىلعان.
ناتيجەسىندە سوت جاريالانىمداردى الىپ تاستاۋعا جانە جالعان مالىمەتتەردى تەرىسكە شىعارۋعا مىندەتتەدى. سونداي-اق ەكى جاۋاپكەردىڭ ارقايسىسىنان مورالدىق زيان ءۇشىن 300 مىڭ تەڭگەدەن ءوندىرىلدى. بۇعان قوسا، سوت شىعىندارىن وتەۋ جۇكتەلدى. اپەللياتسيالىق جانە كاسساتسيالىق ساتىلار بۇل شەشىمدى وزگەرىسسىز قالدىرعان.
جوعارعى سوتتىڭ مالىمەتىنشە، وسىعان ۇقساس تاعى ءبىر ءىس جامبىل وبلىسىندا قارالعان. وندا استانا تۇرعىنى ءوزىنىڭ فوتوسۋرەتى شامامەن 1,5 مىڭ ادام قاتىساتىن WhatsApp چاتتارىندا رۇقساتسىز تاراتىلعانىن انىقتاعان. سوت چاتتاعى سكرينشوتتاردى ەلەكتروندىق دالەل رەتىندە تانىپ، ەكى جاۋاپكەردەن تالاپ قويۋشىنىڭ پايداسىنا مورالدىق زيان ءۇشىن 20 مىڭ تەڭگەدەن وندىرگەن.
