مەملەكەت باسشىسى قاسىم-جومارت توقاەۆ تۇركى مەملەكەتتەرى پارلامەنتتىك اسسامبلەياسىنا مۇشە ەلدەر پارلامەنتتەرىنىڭ سپيكەرلەرىمەن كەزدەستى، دەپ حابارلايدى "ادىرنا" ۇلتتىق پورتالى.
پرەزيدەنت مارتەبەلى مەيماندارعا ءىلتيپات ءبىلدىرىپ، جيىننىڭ ءمان-ماڭىزىنا توقتالدى.
پرەزيدەنت توقاەۆتىڭ ايتۋىنشا، تۇركى مەملەكەتتەرى اراسىنداعى ىنتىماقتاستىق جىلدان-جىلعا ارتىپ كەلەدى. بۇل ۇدەرىس بۇكىل تۇركى جۇرتىنىڭ بەدەلى مەن ىقپالىن كۇشەيتىپ وتىرعانىن ايتتى.
"قازاقستان – تۇركى مەملەكەتتەرى ۇيىمىنىڭ نەگىزىن قالاۋشىلاردىڭ ءبىرى. بۇل قۇرىلىم ەلدەرىمىزدىڭ ەكونوميكالىق جانە مادەني-گۋمانيتارلىق دامۋىنا ىقپال ەتەدى. وتكەن جىلى ۇيىمعا توراعالىق ەتە وتىرىپ، ءبىز ‘TURKTIME’ ۇرانىمەن جۇزگە جۋىق ماڭىزدى ءىس-شارا وتكىزدىك. تۇركى ءالىپبيىنىڭ ورتاق نۇسقاسىن بەكىتۋ – تاريحي وقيعا", – دەدى قاسىم-جومارت توقاەۆ.مەملەكەت باسشىسى استانادا وتكەن V دۇنيەجۇزىلىك كوشپەندىلەر ويىندارىنىڭ ماڭىزىن اتاپ ءوتىپ، ۇيىم اياسىنداعى قارىم-قاتىناستى ودان ءارى نىعايتۋعا دايىن ەكەنىن ءبىلدىردى. پرەزيدەنت كەلەسى باسقوسۋدى تۇركىستاندا وتكىزۋدى ۇسىندى. سونداي-اق قاسىم-جومارت توقاەۆ ەلدە جۇرگىزىلىپ جاتقان ساياسي جانە ەكونوميكالىق رەفورمالار تۋرالى باياندادى. ونىڭ ايتۋىنشا، كونستيتۋتسيالىق وزگەرىستەر، اۋدان اكىمدەرىن تىكەلەي سايلاۋ جانە ءماسليحات جۇيەسىندەگى وزگەرىستەر – ەلىمىزدىڭ دەموكراتيالىق دامۋىنىڭ ماڭىزدى قادامدارى.
"بيىل ەلىمىزدىڭ ءجىو كولەمى 290 ميلليارد دوللارعا جەتىپ، جان باسىنا شاققاندا 14 مىڭ دوللاردى قۇرادى. بۇل وڭ كورسەتكىشتەر، بىراق شەشىلۋى ءتيىس تۇيتكىلدەر دە بار", – دەدى مەملەكەت باسشىسى.پرەزيدەنت ءوز سوزىندە ينفراقۇرىلىمدىق جوبالار، تسيفرلاندىرۋ، جاساندى ينتەللەكت، اۋىل شارۋاشىلىعىن قولداۋ جانە كولىك-لوگيستيكا سالالارىن دامىتۋ – ەكونوميكالىق ءوسىمنىڭ نەگىزگى باعىتى ەكەنىن ايتتى. سونداي-اق تۇركى ەلدەرىمەن ىنتىماقتاستىقتى نىعايتۋ وسى مىندەتتەردى ىسكە اسىرۋدا ماڭىزدى ءرول اتقاراتىنىن اتاپ ءوتتى. كەزدەسۋ سوڭىندا قاسىم-جومارت توقاەۆ تۇركى حالىقتارىنىڭ باۋىرلاستىعى مەن بىرلىگى ورتاق ماقساتقا باستايتىنىن ايتىپ، پارلامەنتتىك ديپلوماتيانىڭ ماڭىزىن ەرەكشە اتادى.
"قازاقستان تۇركى مەملەكەتتەرىنىڭ پارلامەنتتىك ديپلوماتياسىن بارىنشا قولدايدى. ءبىز ءبارىمىز تاتۋ بولساق، ەكونوميكالارىمىز دامىپ، باۋىرلاستىعىمىز ماڭگى بولادى", – دەدى پرەزيدەنت.جيىنعا تۇركى مەملەكەتتەرى پارلامەنتتىك اسسامبلەياسىنا مۇشە ەلدەردىڭ پارلامەنت سپيكەرلەرى قاتىستى. كەزدەسۋ "TURKTIME: پارلامەنتتىك ديپلوماتيانىڭ ءرولى" تاقىرىبىندا ءوتتى.
ۇقساس جاڭالىقتار
