وزبەكستاندا مەرزىمنەن بۇرىن پرەزيدەنت سايلاۋى ءوتتى، دەپ حابارلايدى “ادىرنا” ءتىلشىسى.
شىلدەنىڭ 9-ى كۇنى كورشىلەس وزبەكستاندا پرەزيدەنت سايلاۋى ءوتتى. بۇل سايلاۋ تۇڭعىش رەت مەرزىمنەن بۇرىن وتۋىمەن ەل تاريحىندا قالدى.
9 شىلدە كۇنگى كەشكى 17:00-دەگى مالىمەت بويىنشا سايلاۋشىلاردىڭ قاتىسۋ كورسەتكىشى - 69,85 پايىزدى قۇراعان. ياعني تىركەلگەن 19,2 ميلليون سايلاۋشىنىڭ 13,4 ميلليونى داۋىس بەرگەن.
مەملەكەت ءۇشىن ماڭىزى زور ساياسي وقيعادا بەلسەندىلىك تانىتقان - دجيزاح وبلىسىنىڭ حالقى. ول جاقتان 75,68% سايلاۋشى داۋىس بەرسە، ەڭ از كورسەتكىش تاشكەنتتە تىركەلگەن.
داۋىس بەرۋگە ەلدىڭ قازىرگى باسشىسى شاۆكات ميرزيەەۆ پەن رەسمي وپپوزيتسيالىق پارتيالاردىڭ ءۇش كانديداتى قاتىستى.
سونىمەن قاتار سايلاۋ بارىسىندا وزبەكستاننىڭ بۇرىنعى ءبىلىم ءمينيسترى ۇلىقبەك ينوياتوۆ حالىقتىق دەموكراتيالىق پارتيادان، ابدۋشۇكۇر حامزاەۆ ەكولوگيالىق پارتيادان، جوعارعى سوت توراعاسىنىڭ ورىنباسارى روباحون ماحمۋدوۆا «ادولات» سوتسيال-دەموكراتيالىق پارتياسىنان قاتىستى.
الايدا ادىلەت مينيسترلىگى وپپوزيتسيونەر حىدىرنازار اللاقۇلوۆتىڭ «حاكيكات جانە تاراقكيەت» سوتسيال-دەموكراتيالىق پارتياسىن تىركەمەي، سايلاۋعا قاتىسۋىنا رۇقسات بەرمەدى. 30 ساۋىردە وتكەن رەفەرەندۋمدا وزبەكستان كونستيتۋتسياسىنا تۇزەتۋلەر بەكىتىلگەننەن كەيىن مەرزىمىنەن بۇرىن سايلاۋ تاعايىندالعانىن اتاپ وتەيىك. ولاردىڭ ايتۋىنشا، ەندى پرەزيدەنتتىك مەرزىم بەس ەمەس، جەتى جىل بولىپ بەكىتىلگەن. وسىعان بايلانىستى 2016 جىلدان بەرى بيلىكتە بولعان قازىرگى پرەزيدەنت ميرزيەەۆتىڭ پرەزيدەنتتىك مەرزىمى «قايتا قالىپقا كەلتىرىلدى»، بۇل وعان 2037 جىلعا دەيىن ەكى رەت مەملەكەت باسشىسى بولىپ سايلانۋ مۇمكىندىگىن بەردى. ونىڭ ەندىگى پرەزيدەنتتىڭ وكىلەتتىگى دە كەڭەيەدى.
