پرەزيدەنت قاسىم-جومارت توقاەۆ قازاقستان جولداۋىندا ۇكىمەت سوڭعى 15 جىل بويى الەۋمەتتىك سالادا الاياقتىققا جول بەرىپ كەلگەنىن ايتتى، دەپ حابارلايدى "ادىرنا" ۇلتتىق پورتالى اقورداعا سىلتەمە جاساپ.
مەملەكەت باسشىسى بۇرىنعى كسرو اۋماعىنداعى جانە ودان تىس ايماقتارداعى قاقتىعىستارعا قاتىسقان ازاماتتارعا ارنايى تولەمدەر مەن مەديتسينالىق قىزمەت كورسەتىلىپ وتىرعانىن اتاپ ءوتتى.
الايدا ول الەۋمەتتىك جەڭىلدىكتەردىڭ قولدان كوبەيتىلۋى مەملەكەت قارجىسىن ءتيىمسىز جۇمساۋعا اكەلىپ سوعاتىنىن ەسكەرتتى.
«بۇل قاراجات ەلدى دامىتۋعا، ياعني مەكتەپ، اۋرۋحانا، كولىك ينفراقۇرىلىمدارى سياقتى ماڭىزدى نىسانداردى سالۋعا باعىتتالۋى ءتيىس»، – دەدى توقاەۆ.
پرەزيدەنت مىسال رەتىندە كەزىندە «الەۋمەتتىك جاناشىرلار» ويلاپ تاپقان تولىق ەمەس وتباسىعا بەرىلەتىن جەڭىلدىكتى كەلتىردى. ونىڭ ايتۋىنشا، وسى جەڭىلدىك اجىراسقان وتباسىلار سانىنىڭ كۇرت وسۋىنە سەبەپ بولدى.
ء«بىر كەزدە بۇل كورسەتكىش بويىنشا الەمدە كوش باستاعان ەلدەردىڭ قاتارىنا قوسىلدىق»، – دەدى ول.
سونىمەن قاتار، توقاەۆ ماقساتسىز تولەمدەردىڭ جالقاۋلىق پەن ماسىلدىقتى كۇشەيتىپ وتىرعانىن سىنعا الدى.
"تۋراسىن ايتساق، الەۋمەتتىك سالادا وڭتايلى شەشىم قابىلداۋدىڭ ورنىنا، ۇكىمەت كەمىندە 15 جىل بويى الەۋمەتتىك ماسىلدىق پەن الەۋمەتتىك الاياقتىققا جول بەرىپ كەلدى" - دەدى مەملەكەت باسشىسى.
