قازاقستان پرەزيدەنتى قاسىم-جومارت توقاەۆ حالىققا ارناعان جولداۋىندا ەل ەكونوميكاسىن جاڭعىرتۋ ءۇشىن جاساندى ينتەللەكت جانە تسيفرلىق دامۋ مينيسترلىگىن قۇرۋدى ۇسىندى، دەپ حابارلايدى "ادىرنا" ۇلتتىق پورتالى اقوردانىڭ ءباسپاسوز قىزمەتىنە سىلتەمە جاساپ.
توقاەۆتىڭ ايتۋىنشا، ەڭ الدىمەن، تسيفرلىق كودەكستى قابىلداۋ قاجەت. وندا تسيفرلاندىرۋ ۇدەرىسىنىڭ باستى باعىتتارى – جاساندى ينتەللەكت، پلاتفورمالىق ەكونوميكا، ۇلكەن دەرەكتەردى پايدالانۋ جانە باسقا دا ماسەلەلەر ايقىندالۋى ءتيىس.
پرەزيدەنت جاڭا تەحنولوگيالىق جۇيەگە بەيىمدەلۋ ءۇشىن مەملەكەتتىك باسقارۋدى قايتا قۇرۋدىڭ ماڭىزدىلىعىن ەرەكشە اتاپ ءوتتى. ونىڭ سوزىنشە، باسقارۋ جۇيەسى ازاماتتاردىڭ مۇددەسىنە ساي بولۋى، اشىقتىق پەن تيىمدىلىكتى ارتتىرۋى كەرەك.
«سوندىقتان قازىرگى قۇزىرلى مينيسترلىكتىڭ نەگىزىندە جاساندى ينتەللەكت جانە تسيفرلىق دامۋ مينيسترلىگىن قۇرۋ قاجەت دەپ سانايمىن. جاڭا مينيسترلىكتى پرەمەر-ءمينيستردىڭ ورىنباسارى دەڭگەيىندەگى مامان باسقارۋى ءتيىس»، – دەدى ق.توقاەۆ.
مەملەكەت باسشىسى ۇكىمەتكە ەكونوميكانىڭ بارلىق سالاسىندا جاساندى ينتەللەكتىنى كەڭىنەن ەنگىزۋدى تاپسىردى. ول قازاقستاننىڭ باسەكەگە قابىلەتتى ەل رەتىندە دامۋى ءۇشىن جۇمىستى مۇلدە جاڭا تاسىلمەن جۇرگىزۋ قاجەتتىگىن باسا ايتتى
