استانالىق NIS-ءتىڭ 11 سىنىپ وقۋشىسى باتىرحان مۇحتارحان گرەكيادا وتكەن حالىقارالىق ەكونوميكا وليمپياداسىندا (EO-2025) ءابسوليۋتتى چەمپيون اتاندى، دەپ حابارلايدى “ادىرنا”.
EO-2025 وليمپياداسىنا الەمنىڭ تۇكپىر-تۇكپىرىنەن ۇلتتىق ىرىكتەۋدەن وتكەن 100 مىڭنان استام ۇمىتكەر قاتىستى. فينالدا 28 ەلدەن كەلگەن 128 مىقتىلار باق سىنادى. ولار ەكونوميكا مەن قارجى سالاسىنداعى ەڭ كۇردەلى تەوريالىق جانە پراكتيكالىق تاپسىرمالاردى – ناقتى جاعدايلاردى تالداۋدان باستاپ شەشىمدەردى مودەلدەۋگە دەيىن ورىندادى.
باتىرحان جالپى ەسەپتە ءبىرىنشى ورىندى سەنىمدى تۇردە يەلەنىپ، اقش، كانادا، قىتاي، نيدەرلاندى، پولشا، چەحيا، گرەكيا جانە باسقا دا ەلدەردىڭ قارسىلاستارىن ارتتا قالدىردى.
ايتا كەتەيىك، باتىرحاننىڭ قورجىنىندا بىرقاتار جەتىستىكتەر بار: ەكونوميكا جانە قارجى بويىنشا رەسپۋبليكالىق وليمپيادانىڭ قولا جۇلدەسى، ەكونوميكادان حالىقارالىق وليمپيادانىڭ (IEO-2024, گونكونگ) قولا جۇلدەسى، IEO-2025 (ازەربايجان) التىن جۇلدەسى، EFI وليمپياداسىنداعى جەڭىس (نارحوز، قازاقستان). كەزەكتى – جەڭىسى EO-2025 ءابسوليۋتتى التىنى.
"مەن ءۇشىن ەڭ باستىسى – جاڭا نارسەنى ۇيرەنۋ، كۇردەلى تاپسىرمالاردى شەشۋ جانە ءوزىمدى دامىتۋ. ءوز جەتىستىكتەرىممەن زامانداستارىمدى شابىتتاندىرعىم كەلەدى", – دەيدى باتىرحان.
وقۋ-اعارتۋ مينيسترلىگى باتىرحان مۇحتارحاننىڭ جاڭا بۋىن زياتكەرلەرىنىڭ جارقىن وكىلى ەكەنىن باسا اتاپ وتەدى.
"ونىڭ جەتىستىكتەرى تەك جەكە جەڭىس قانا ەمەس، سونىمەن قاتار قازاقستاننىڭ الەمدىك ءبىلىم بەرۋ ارەناسىنداعى بەدەلىن ارتتىردى.ء بىز باتىرحانعا جاڭا وقۋ جىلىندا ەلىمىزدىڭ يگىلىگى ءۇشىن بۇدان دا بيىك شىڭداردى باعىندىرۋىن تىلەيمىز", دەلىنگەن ۆەدومستۆو حابارلاماسىندا.
