استانا قالاسىنداعى №1 اۆتوپارك جول اپاتىنان كەيىن ەكى اياعىنان ايىرىلعان الۋا ەسىمدى ءبۇلدىرشىن مەن ونىڭ وتباسىنا ءومىر بويى ماتەريالدىق قولداۋ كورسەتەتىنىن مالىمدەدى، دەپ حابارلايدى "ادىرنا" ۇلتتىق پورتالى.
الۋانىڭ تۋىستارى الەۋمەتتىك جەلىدەگى قايىرىمدىلىق پاراقشاسىندا 11 ماۋسىم كۇنى اۆتوپاركتىڭ باسقارما توراعاسى ماديار تۇقپاتوۆپەن كەزدەسۋ وتكەنىن جازدى. كەزدەسۋ بارىسىندا اۆتوپارك وكىلى بولعان وقيعا ءۇشىن جاۋاپكەرشىلىكتى موينىنا الىپ، الۋا مەن ونىڭ اناسى ماحابباتتىڭ ءتورت بالاسىنا دا لايىقتى ءومىر ءسۇرۋ دەڭگەيىن قامتاماسىز ەتۋ مىندەتتەمەسىن العانىن جەتكىزگەن.
«قىزدىڭ وتباسى زاڭگەرلەر مەن ەكونوميستەردىڭ كومەگىمەن ينفلياتسيانى ەسكەرە وتىرىپ، قاجەتتى شىعىنداردى ەسەپتەپ جاتىر. ەسەپتەۋلەر اياقتالعان سوڭ، اۆتوپارك پەن وتباسى اراسىندا رەسمي كەلىسىمشارت جاسالىپ، تولەمدەر باستالادى»، – دەلىنگەن حابارلامادا.
الۋانىڭ جاقىندارى قولداۋ ءبىلدىرىپ، كومەك كورسەتكەن بارشا ازاماتتارعا العىس ءبىلدىردى.
«الۋا ءۇشىن دۇعا ەتىپ، قايعىمىزبەن بولىسكەن، سوزبەن دە، ىسپەن دە جاردەمدەسكەن ءاربىر ادامعا شەكسىز ريزاشىلىعىمىزدى بىلدىرەمىز. سىزدەردىڭ ارقالارىڭىزدا ءبىز جالعىز ەمەستىگىمىزدى سەزىندىك»، – دەپ جازدى ولار.
ەسكە سالايىق، استانادا ورىن العان جول اپاتىنان 15 ادام زارداپ شەككەن، ونىڭ ىشىندە 6 بالا بار. 2017 جىلى تۋعان الۋا العان اۋىر جاراقاتتار سالدارىنان ەكى اياعىنان ايىرىلدى. جول-كولىك وقيعاسىنا كىنالى اۆتوبۋس جۇرگىزۋشىسى قاماۋعا الىندى.
