قازاقستان ۇلتتىق قۇراماسى ساداق اتۋدان الەم چەمپيوناتىندا تاريحي جەتىستىككە قول جەتكىزدى. بۇل جەڭىس ەل قورجىنىنا وسى سپورت تۇرىنەن 32 جىلدان كەيىن العاش رەت جۇلدە سالۋمەن ەرەكشەلەندى. بۇل تۋرالى قر تۋريزم جانە سپورت ءمينيسترى ەربول مىرزابوسىنوۆ مالىمدەدى، دەپ حابارلايدى “ادىرنا”.
جاھاندىق دودادا ەل نامىسىن قورعاعان ادەليا جەكسەنبينوۆا، ۆيكتوريا ليان جانە روكسانا يۋنۋسوۆا وزدەرىنىڭ شەبەرلىكتەرى مەن جەڭىسكە دەگەن جىگەرىن كورسەتىپ، قازاقستان سپورت تاريحىندا جاڭا بەلەس اشتى.
“مەملەكەت باسشىسىنىڭ تاپسىرماسىمەن ەلىمىزدە سپورت سالاسىن جاڭعىرتۋ جۇمىستارى كەڭ اۋقىمدا جۇرگىزىلىپ جاتىر. بۇل – سالانىڭ تيىمدىلىگىن ارتتىرۋعا جانە جاڭا چەمپيونداردى تاربيەلەۋگە باعىتتالعان ماڭىزدى باستاما. بۇگىندە وتاندىق سپورت جاڭا قارقىنمەن دامىپ كەلەدى”، دەپ جازدى مينيستر.
جۇلدەلى ورىنعا قول جەتكىزۋدە قازاقستان ساداق اتۋ فەدەراتسياسىنىڭ دا ەڭبەگى زور. فەدەراتسيا پرەزيدەنتى ازامات ۇسىمبەكوۆ پەن باس حاتشى ەسەت بايتاسوۆتىڭ باسشىلىعىمەن بۇگىندە ەلىمىزدە 7 مىڭنان استام سپورتشى ساداق اتۋمەن اينالىسادى. بۇل سپورت ءتۇرى قازاقستاننىڭ 15 وڭىرىندە بەلسەندى دامىپ كەلەدى.
ساراپشىلاردىڭ ايتۋىنشا، بۇل جەتىستىك – ەلىمىزدە ساداق اتۋ سپورتىنىڭ بەرىك ىرگەتاسى قالانعانىنىڭ ايقىن دالەلى. سونىمەن قاتار حالىقارالىق ارەنادا جاڭا تابىستارعا جەتۋگە زور الەۋەت بار ەكەنىن كورسەتىپ وتىر.
