ارمەنيا استاناسى ەرەۆاندا سامبودان ەرەسەكتەر اراسىندا ءوتىپ جاتقان الەم چەمپيوناتىنىڭ العاشقى كۇنى قازاقستان قورجىنىنا ەكى مەدال ءتۇستى، دەپ حابارلايدى «ادىرنا» ۇلتتىق پورتالى.
سپورتتى دامىتۋ ديرەكتسياسىنىڭ مالىمەتىنشە، قازاقستاندىق مارگاريتا باجاەۆا 50 كەلىگە دەيىنگى سالماقتا فينالعا دەيىن سۇرىنبەي جەتتى. م.باجاەۆا شەشۋشى بەلدەسۋدە وزبەكستاندىق گۋلسەۆار ۋراكوۆاعا ەسە جىبەردى.
مارگاريتا بىلتىر دا الەم بىرىنشىلىگىنە قاتىسىپ، 5-ورىن العان بولاتىن.
سونداي-اق گۇلدانا المۇحامبەتوۆا 54 كەلىگە دەيىنگى سالماقتا قولا جۇلدە ءۇشىن باسەكەدە وتكەن جىلعى الەم چەمپيونى، بەلارۋس وكىلى الەنا كۋپاۆانى ۇتىپ، ۇزدىك ۇشتىككە ىلىكتى. وسىلايشا، العاشقى كۇندى قازاقستان قۇراماسى 1 كۇمىس، 1 قولا مەدالمەن قورىتىندىلادى.
ايتالىق، سامبودان الەم بىرىنشىلىگىنە 62 مەملەكەتتەن 335 سپورتشى قاتىسىپ جاتىر. اتالمىش تۋرنير رەسەي مەن ۋكراينا ەلدەرى ءبىر مەزەتتە باستارى قوسىلعان ساناۋلى جارىستىڭ قاتارىنا كىردى. دەگەنمەن، سايىستا قوس ەلدىڭ وكىلدەرى قول الىسپايدى.
سونىمەن بىرگە ايتۋلى دوداعا ازەربايجان مەن تۇركيا قاتىسۋدان باس تارتتى.
چەمپيونات 12 قاراشادا اياقتالادى.
«ادىرنا» ۇلتتىق پورتالى
