الماتىداعى بەلگىلى قىلمىستىق ىستەر بويىنشا سوتتالعان گۇلميرا ساتىبالدىعا قاتىستى كەزەكتى قىلمىستىق ءىس بويىنشا ۇكىم شىقتى، دەپ حابارلايدى “ادىرنا” ۇلتتىق پورتالى.
«Kozachkov offside» Telegram ارناسىنىڭ مالىمەتىنشە،
استانا قالاسىنىڭ قىلمىستىق ىستەر جونىندەگى اۋدانارالىق سوتىندا 56 جاستاعى گۇلميرا ساتىبالدىعا قاتىستى ءتورتىنشى قىلمىستىق ءىس قارالدى. سوت ونى تاعىلعان ايىپتاردىڭ بارلىعى بويىنشا كىنالى دەپ تانىدى.
بۇل ءىس ساتىبالدىنىڭ مارقۇم اپكەسىنىڭ بۇرىنعى كۇيەۋى اباي جۇنىسوۆكە قاتىستى ارەكەتتەرىنە بايلانىستى قوزعالعان. سوت ماتەريالدارىنا سايكەس، ساتىبالدى مەن ءجۇنىسوۆ بۇعان دەيىن كاسىپكەرلىكپەن اينالىسىپ، الماتىداعى «ۆوستوچكا» تۇرعىن ءۇي كەشەنىن سالعان. جوبانى جۇزەگە اسىرۋ كەزىندە مەملەكەتتىك قارجى دا تارتىلعان.
ءىس ماتەريالدارىندا كەيىن اباي ءجۇنىسوۆتىڭ بىرقاتار قۇجاتتارعا قول قويۋعا جانە كومپانيالارداعى ۇلەستەرىن ساتىبالدىنىڭ ادامدارىنا بەرۋگە ءماجبۇر بولعانى كورسەتىلگەن. ناتيجەسىندە تۇرعىن ءۇي كەشەنىندەگى نىساندار ساتىلىپ، ونىڭ «ۆتب بانكى» الدىنداعى بەرەشەگى 8 ميلليارد تەڭگەدەن اسقان.
سوتتا ءجۇنىسوۆ قۇجاتتاردى قىسىم جاعدايىندا راسىمدەگەنىن مالىمدەدى. ونىڭ ايتۋىنشا، ول بىرنەشە اي بويى گۇلميرا ساتىبالدىنىڭ ءۇيىنىڭ جەرتولەسىندە ۇستالعان.
ال ساتىبالدى وزىنە تاعىلعان ايىپتاردى مويىندامادى. ول ايىپتاۋ اكتىسىندەگى كەيبىر تۇجىرىمداردىڭ وزىنە تۇسىنىكسىز ەكەنىن ايتىپ، ءجۇنىسوۆتىڭ بانك الدىنداعى قارىزىنىڭ قالىپتاسۋىنا قاتىسى جوق ەكەنىن ايتتى.
سوت ۇكىمىمەن گۇلميرا ساتىبالدى كىنالى دەپ تانىلدى. الايدا وعان بۇرىن تاعايىندالعان 12 جىل باس بوستاندىعىنان ايىرۋ جازاسى وزگەرىسسىز قالدى.
سونىمەن قاتار سوت اباي جۇنىسوۆكە كەلتىرىلگەن ماتەريالدىق شىعىندى وتەۋ ءۇشىن ساتىبالدىدان 8 ميلليارد تەڭگەدەن استام قارجى ءوندىرىپ الۋ تۋرالى شەشىم شىعاردى.
گۇلميرا ساتىبالدى العاش رەت 2023 جىلى سوتتالعان. ءبىرىنشى ءىس بويىنشا ول ءوز بەتىنشە بيلىك ەتۋ جانە ادام ۇرلاۋ باپتارى بويىنشا كىنالى دەپ تانىلعان. كەيىن وعان بوتەننىڭ مۇلكىن يەمدەنۋ جانە ىسىراپ ەتۋ بويىنشا تاعى ءبىر ۇكىم شىققان. ەكى ءىستىڭ جيىنتىعى بويىنشا ونىڭ جازاسى 8 جىلدى قۇراعان.
2024 جىلى ساتىبالدىعا قاتىستى تاعى ءبىر قىلمىستىق ءىس قارالىپ، وعان بوپسالاۋ جانە زاڭسىز باس بوستاندىعىنان ايىرۋ بويىنشا ايىپ تاعىلدى. ۇكىمدەر جيىنتىعى بويىنشا ونىڭ جالپى جازاسى 12 جىلعا دەيىن ۇزارتىلعان.
سوتتىڭ بۇل جولعى ۇكىمى ازىرگە زاڭدى كۇشىنە ەنگەن جوق.
