جاڭا وقۋ جىلىنان باستاپ شاحتينسك قالاسىنىڭ وقۋشىلارى كارتينگپەن اينالىسىپ، VR-تەحنولوگيالاردى مەڭگەرۋ مۇمكىندىگىنە يە بولادى. سونداي-اق سۇرانىسقا يە باسقا دا باعىتتار بويىنشا ۇيىرمەلەر اشىلادى.
№2 وقۋشىلار سارايىندا ۇيىمداستىرىلاتىن بۇل ساباقتار بالالاردىڭ تانىم كوكجيەگىن كەڭەيتىپ قانا قويماي، ەرتە جاستان ينجەنەرلىك ويلاۋ قابىلەتى مەن كاسىبي داعدىلارىن دامىتۋعا ىقپال ەتەدى.
اۆتوكارتينگ ۇيىرمەسى جۇمىسشى ماماندىقتار جىلى اياسىندا جۇزەگە اسىرىلىپ جاتقان «تارلان» جوباسىنىڭ قۇرامىنا ەنەدى. مۇندا بالالار كارت جۇرگىزۋدى ۇيرەنىپ، تەحنيكالىق سالاداعى العاشقى تاجىريبەسىن جيناقتايدى.
– اۆتوكارتودرومدى دايىنداۋ جۇمىستارى شامامەن ءۇش ايعا سوزىلدى. جاز بويى سارايدىڭ ارتىنداعى الاڭ اباتتاندىرىلىپ، عيماراتتىڭ قاسبەتى مەن گاراجدار جوندەلدى، جاڭا اسفالت توسەلدى، – دەدى وقۋشىلار سارايىنىڭ ديرەكتورى يرينا شميك.
قاجەتتى ينفراقۇرىلىم تولىق دايىن: 10 كارت پەن بارلىق كەرەك-جاراق ساتىپ الىندى، سەگىز گاراجدان تۇراتىن بازا جابدىقتالدى. قازىر ۇيىرمەدە ساباق بەرەتىن، وقۋشىلاردى جۇرگىزۋ ماشىعىنا جانە جول قوزعالىسى ەرەجەلەرىنىڭ نەگىزدەرىنە ۇيرەتەتىن پەداگوگتاردى قابىلداۋ ءجۇرىپ جاتىر.
ساباقتار ەكى جاس ساناتى بويىنشا وتەدى — 10–12 جانە 12–17 جاس. باعدارلامادا كارت جۇرگىزۋ داعدىلارىنان بولەك، تەحنيكا قۇرىلىمىن تانىپ-ءبىلۋ، ديناميكا زاڭدىلىقتارىن مەڭگەرۋ جانە جول قوزعالىسى ەرەجەلەرىن وقۋ قاراستىرىلعان. ۇيىرمەگە قابىلداۋ 15 قىركۇيەكتەن باستالادى.
كارتينگ شاحتينسك قالاسىندا ءاردايىم سۇرانىسقا يە سپورت ءتۇرى بولىپ كەلدى. بۇل باعىتتا 20 جىلدان استام تاجىريبە جيناقتالىپ، دامۋىنا قاجەتتى بازا قالىپتاسقان.
بۇگىندە وقۋشىلار سارايىندا 4 جاستان 18 جاسقا دەيىنگى ەكى مىڭنان استام بالا قاتىساتىن 11 باعىت بويىنشا 147 ۇيىرمە جۇمىس ىستەيدى. 2025 جىلى «قازاقستان حالقىنا» قورى مەن ءبىلىم بەرۋدى تۇراقتى دامىتۋ قورىنىڭ قولداۋىمەن ينجەنەرلىك-تەحنيكالىق باعىتتاعى ۇيىرمەلەردىڭ (روبوتوتەحنيكا، اۆتوكاسىپ جانە ت. ب.) ماتەريالدىق-تەحنيكالىق بازاسى ەداۋىر جاڭارتىلىپ، زاماناۋي STEM-جابدىقتار ساتىپ الىندى. بيىلعى وقۋ جىلىندا VR-تەحنولوگيالار جانە تەلەستۋديا سىندى جاڭا باعىتتار ىسكە قوسىلادى.
