اقمولا وبلىسىندا بانك قىزمەتكەرلەرى قاتىسقان ۇيىمداسقان قىلمىستىق توپتىڭ ءىسى بويىنشا تەرگەۋ اياقتالدى، دەپ حابارلايدى "ادىرنا" ۇلتتىق پورتالى.
پروكۋراتۋرانىڭ مالىمەتىنشە، توپ قۇرامىندا ءارتۇرلى وڭىردەن جينالعان 25 ادام بولعان، ولاردىڭ اراسىندا «Kaspi Bank»، «Forte Bank»، «ەۋرازيالىق بانك» جانە «Jusan Bank» قىزمەتكەرلەرى دە بار.
قىلمىستىق توپ الەۋمەتتىك وسال توپتاعى ازاماتتاردىڭ اتىنا ءىرى كولەمدە نەسيە راسىمدەپ وتىرعان. تەرگەۋ بارىسىندا 348 ادامنىڭ جابىرلەنۋشى بولعانى انىقتالدى. كەلتىرىلگەن شىعىن كولەمى 3,7 ملرد تەڭگەنى قۇرادى.
سونىمەن قاتار، قىلمىستىق جولمەن الىنعان مۇلىكتەر تاركىلەندى. الماتى قالاسىنداعى پاتەرلەر مەن جەر ۋچاسكەلەرى، قىمبات كولىكتەر مەن ءىرى كولەمدەگى قولما-قول اقشا. تاركىلەنگەن مۇلىكتىڭ جالپى قۇنى 2,7 ملرد تەڭگەگە جەتكەن.
بارلىق كۇدىكتىلەر ۇستالىپ، ۋاقىتشا ۇستاۋ يزولياتورىنا قامالدى. تەرگەۋ مالىمەتىنشە، بۇل قىلمىستىق سحەما بەس جىلدان استام ۋاقىت بويى جۇزەگە اسىپ كەلگەن.
بۇل ءىستىڭ اشىلۋىنا زەرەندى اۋدانى تۇرعىندارىنىڭ شاعىمى سەبەپ بولعان. اسىرەسە زەينەتكەرلەر مەن از قامتىلعان ازاماتتار ءوز اتتارىنا راسىمدەلگەن، بىراق ەشقاشان الماعان نەسيەلەرگە قاتىستى ارىز تۇسىرگەن. وسىدان كەيىن 2024 جىلدىڭ قاراشاسىندا قىلمىستىق ءىس قوزعالىپ، تەكسەرۋ باستالعان.
