فوتو: AP
رەسەيدىڭ ۋكرايناعا جاساعان جاپپاي شابۋىلى سالدارىنان حاركوۆ قالاسىندا ءۇش ادام قازا تاۋىپ، تاعى 11 ادام جارالاندى، دەپ حابارلايدى "ادىرنا" ۇلتتىق پورتالى.
بۇل تۋرالى DW باسىلىمى حابارلادى.
الدىن الا مالىمەت بويىنشا، 13 قازانعا قاراعان ءتۇنى جاسالعان شابۋىل حاركوۆتىڭ حولودنوگور جانە شەۆچەنكو اۋداندارىنداعى تۇرعىن ۇيلەر مەن ازاماتتىق ينفراقۇرىلىم نىساندارىنا تيگەن.
ۋكراينانىڭ توتەنشە جاعدايلار جونىندەگى مەملەكەتتىك قىزمەتىنىڭ حابارلاۋىنشا، زىمىرانداردىڭ ءبىرى ءتورت قاباتتى تۇرعىن ۇيگە ءتۇسىپ، كىرەبەرىس بولىگىن تولىعىمەن قيراتقان. قۇتقارۋشىلار ءۇيىندى استىندا قالعان ادامدار بولۋى مۇمكىن دەگەن بولجاممەن ىزدەستىرۋ جۇمىستارىن جالعاستىرىپ جاتىر.
بۇعان دەيىن، 12 قازان كۇنى كەشكە رەسەي اسكەرى كيەۆكە دە بالليستيكالىق زىمىراندارمەن جانە ۇشقىشسىز ۇشۋ اپپاراتتارىمەن شابۋىل جاساعان. كيەۆ مەرى ۆيتالي كليچكونىڭ مالىمەتىنشە، دارنيتسكي اۋدانىندا درون 25 قاباتتى تۇرعىن ءۇيدىڭ 12–16-قاباتتارى ارالىعىنا سوعىلعان. وقيعا سالدارىنان ەكى ادام قازا تاۋىپ، تاعى 11 ادام جارالانعان.
ۋكراينا اۋە كۇشتەرىنىڭ مالىمەتىنشە، رەسەي اۋماعىنان بالليستيكالىق زىمىراندار ۇشىرىلعانى تۋرالى اقپارات اسكەري قىزمەتكەرلەرگە ۋاقىتىلى تۇسپەگەن. سونىڭ سالدارىنان كيەۆتە اۋە دابىلىن دەر كەزىندە جاريالاۋ مۇمكىن بولماعان. بالليستيكالىق نىساندار راديولوكاتسيالىق قۇرالدار ارقىلى شابۋىل كەزىندە انىقتالعان. قازىر وقيعانىڭ سەبەپتەرى ناقتىلانىپ جاتىر.
